مەملەكەت باسشىسى قاسىم-جومارت توقاەۆ قازاقستان اۋە قورعانىسى كۇشتەرىنىڭ تالدىقورعانداعى اۋە بازاسىن سەرگەي لۋگانسكيدىڭ اتىمەن اتاۋدى ۇسىندى. بۇل تۋرالى ول ۇلتتىق قۇرىلتايدا ايتتى, دەپ حابارلايدى Egemen.kz.
«جەڭىستىڭ 80 جىلدىعىنا وراي زەرتتەۋلەر تىڭ قارقىنمەن جالعاسادى دەپ سەنەمىن. سۇراپىل سوعىس كەزىندەگى اعا بۋىننىڭ وشپەس ەرلىگى مەن ەرەن ەڭبەگىن ۇرپاق جادىندا جاڭعىرتۋ وتە ماڭىزدى. مەملەكەت بۇل باعىتتاعى جۇمىستى جالعاستىرا بەرەدى. مالىك عابدۋللين, سابىر راحيموۆ, ءاليا مولداعۇلوۆا, مانشۇك مامەتوۆا جانە باسقا دا باتىرلاردىڭ ەسىمى ەلدى مەكەندەرگە, ءتۇرلى نىساندارعا, كوشەلەرگە بەرىلگەن. ۋچيليششەلەردى, اۆياتسيا بازالارىن جانە اۋەجايلاردى باتىر قىراندارىمىزدىڭ ەسىمىمەن اتاۋ داستۇرگە اينالدى. مىسالى, اقتوبەدەگى اۋە قورعانىسى كۇشتەرىنىڭ اسكەري ينستيتۋتى تالعات بيگەلدينوۆتىڭ اتىمەن اتالادى. قاراعاندىداعى اۆياتسيا بازاسىنا نۇركەن ءابدىروۆتىڭ, اتىراۋداعى حالىقارالىق اۋەجايعا حيۋاز دوسپانوۆانىڭ ەسىمى بەرىلگەن. بۇل باعىتتاعى جۇمىستى جالعاستىرۋ قاجەت», دەدى مەملەكەت باسشىسى.
وسى ورايدا ول مايدان شەبىندە ەرەكشە قاھارماندىعىمەن دارالانعان ايگىلى ۇشقىش, كەڭەس وداعىنىڭ ەكى مارتە باتىرى سەرگەي لۋگانسكيدىڭ ەرلىگى لايىقتى باعالانۋعا ءتيىس ەكەنىن ايتتى.
«الماتىنىڭ ءبىر كوشەسى وسى قالادا تۋعان داڭقتى ۇشقىشتىڭ ەسىمىمەن اتالادى. قازاقستان اۋە قورعانىسى كۇشتەرىنىڭ تالدىقورعانداعى اۋە بازاسىن دا سەرگەي لۋگانسكيدىڭ اتىمەن اتاعان ءجون دەپ سانايمىن. سونداي-اق ءبىز كەزىندە ەرلىگى ەلەنبەي قالعان باتىرلارىمىزعا «حالىق قاھارمانى» اتاعىن بەرۋدى يگى داستۇرگە اينالدىردىق. ەڭ جوعارعى اسكەري اتاق 2022 جىلى مارقۇمدار تولەۋعالي ابدىبەكوۆكە, الەكساندر نەسميانوۆقا جانە ىبىرايىم سۇلەيمەنوۆكە بەرىلدى. ال 2023 جىلى ءجۇز جاساعان اقساقالدارىمىز ابدىعالي قايمولدين مەن يۆان گاپيچ وسى مارتەبەلى اتاققا يە بولدى. ەكىنشى دۇنيەجۇزىلىك سوعىستاعى باتىرلاردىڭ ەرلىگى – بۇگىنگى جانە بولاشاق وتان قورعاۋشىلار ءۇشىن شىنايى ۇلگى-ونەگە», دەدى پرەزيدەنت.