مەملەكەت باسشىسى قاسىم-جومارت توقاەۆ ەلىمىزدەگى تەڭدەسسىز تاريحي نىسانداردى ساقتاپ قالۋ بويىنشا قۇزىرلى ورعاندارعا تاپسىرما بەردى, دەپ حابارلايدى Egemen.kz.
«بىلتىر قازاقستان يۋنەسكو-نىڭ دۇنيەجۇزىلىك مۇرالار كوميتەتىنە مۇشە بولىپ سايلاندى. مۇنداي مۇمكىندىكتى ۇتىمدى پايدالانۋىمىز كەرەك. التىنەمەل جانە بارساكەلمەس يۋنەسكو مۇرالارى تىزىمىنە ەنگىزىلدى. رۋحاني ماڭىزى بار جۇمىستى جالعاستىرۋ قاجەت», دەدى پرەزيدەنت.
مەملەكەت باسشىسىنىڭ ايتۋىنشا, ەلىمىزدە قايتالانباس تابيعي جانە تاريحي مەكەندەر كوپ. وسىنداي تەڭدەسى جوق ورىنداردىڭ ءبىرى – ءبىزدىڭ ۇلتتىق ماقتانىشىمىز بۇل – ءۇستىرت قورىعى. ونداعى تىلسىم تابيعات كورىنىستەرى تۋريستەردىڭ ەرەكشە قىزىعۋشىلىعىن تۋعىزادى. شەتەلدىڭ تانىمال كاسىبي فوتوگرافتارى ونى سۋرەتكە ءتۇسىرۋ ءۇشىن الىستان ارنايى كەلەدى.
«بۇل جەردەگى تاعى ءبىر تاڭعاجايىپ مۇرا – جەراستى مەشىتتەرى. باتىس ايماقتا وسىنداي 20-دان استام مەشىت بار. تاريحي نىساندار ءارتۇرلى كەزەڭدە سالىنعان جانە ءبىر-بىرىنەن وزگەشە. مۇنىڭ ءوزى ەلىمىزدىڭ رۋحاني كەڭىستىگىندە ەرەكشە داستۇرلەر بولعانىن جانە تامىرى تەرەڭدە جاتقانىن كورسەتەدى. ءبىز ونىڭ ءبارىن مۇقيات ساقتاپ, جەر جۇزىنە تانىتۋىمىز قاجەت», دەدى ق.توقاەۆ.
پرەزيدەنت ءتيىستى مەملەكەتتىك ورگاندارعا ۇلتتىق كوميسسيامەن بىرلەسىپ, وسى نىسانداردى يۋنەسكو مۇرالارى تىزىمىنە قوسۋ جونىندەگى جۇمىستى باستاۋدى تاپسىردى.
«قازاقستاندى «تاڭبالى تاستار مەكەنى» دەپ بەكەر ايتپايدى. ەشكىولمەس جوتاسى – ەۋرازيا قۇرلىعىنداعى پەتروگليفى ەڭ كوپ جەردىڭ ءبىرى. ارپاوزەن, قۇلجاباسى, ساۋىسقاندىق سايلارىندا كوپتەگەن تاريحي سۋرەت ساقتالعان. بۇل جادىگەرلەر – دالا وركەنيەتىنىڭ سان مىڭ جىلدىق شەجىرەسى.
سوڭعى جىلدارى قۇرىلىسقا قاجەت دەگەن جەلەۋمەن كەيبىر جادىگەرلەرىمىز ءب ۇلىنىپ جاتىر. ءبىز تەڭدەسسىز تاريحي نىساندارىمىزدى جويۋعا جول بەرمەي, مۇقيات قورعاۋىمىز كەرەك. قۇزىرلى ورگاندارعا ءتيىستى شارا قابىلداۋدى تاپسىرامىن. قاجەت بولسا, زاڭناماعا وزگەرىس ەنگىزۋ ماسەلەسىن قاراستىرعان ءجون», دەدى ەل پرەزيدەنتى.