ەلىمىزدەگى ساراپشىلار قاۋىمداستىعىنىڭ جانە مەملەكەتتىك ورگانداردىڭ وكىلدەرى زاڭ شىعارۋ قىزمەتىنە جاساندى ينتەللەكتىنى ەنگىزۋ ماسەلەلەرىن تالقىلاپ, وسى سالاداعى بىرلەسكەن جۇمىستىڭ باعىتتارىنا نازار اۋداردى. اتالعان جيىن كەشە سەنات توراعاسى ماۋلەن اشىمباەۆتىڭ قاتىسۋىمەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ احۋالدىق ورتالىعىندا ءوتتى.
پالاتا سپيكەرى رەفورمالاردىڭ تيىمدىلىگى جانە ولاردى دۇرىس ىسكە اسىرۋ كوبىنە زاڭنامانىڭ ساپاسىنا بايلانىستى ەكەنىن اتاپ ءوتتى. سونداي-اق ول جاڭا فورماتسياداعى زاڭدار دايىنداۋعا عىلىمي-ساراپتامالىق قوعامداستىقتى جۇمىلدىرۋدىڭ جانە وڭتايلى زاڭنامالىق شەشىمدەر قابىلداۋعا زاماناۋي تەحنولوگيالاردى قولدانۋدىڭ ماڭىزى زور ەكەنىن ايتتى. بۇل رەتتە بۇگىندە ءتۇرلى سالادا ايتۋلى ناتيجەلەرگە قول جەتكىزىپ وتىرعان جاساندى ينتەللەكت ءتيىمدى تەتىك بولا الادى.
سەنات توراعاسىنىڭ ايتۋىنشا, قازىرگى تاڭدا ەلىمىزدە بۇل سالا قۇقىقتىق تۇرعىدان تولىق رەتتەلمەگەن.
«پارلامەنت جىل سايىن ورتا ەسەپپەن 100-گە جۋىق زاڭ قابىلدايدى. ۇكىمەت پەن مينيسترلىكتەر سوڭعى ون جىلدىڭ وزىندە عانا 30 مىڭنان استام نورماتيۆتىك-قۇقىقتىق اكت قابىلدادى. بۇل – اۋقىمدى دەرەكتەر جيىنتىعى دەگەن ءسوز. نورماتيۆتىك-قۇقىقتىق اكتىلەردى جاڭا تەحنولوگيالاردىڭ مۇمكىندىكتەرىن پايدالانا وتىرىپ تالداۋ قابىلداناتىن زاڭنامالىق شەشىمدەردىڭ ساپاسىن ايتارلىقتاي ارتتىراتىنى انىق. بىزدە زاڭداردى ازىرلەۋ مەن كەلىسۋدىڭ جەكەلەگەن كەزەڭدەرى ءالى دە قاعاز جۇزىندە جۇرگىزىلەدى, ياعني ۇدەرىستەردىڭ ءبىر بولىگى تسيفرلاندىرىلماعان. سوندىقتان زاڭ شىعارۋ قىزمەتىندە جاساندى ينتەللەكتىنى, جالپى تسيفرلىق تەحنولوگيالاردى پايدالانۋ مۇمكىندىكتەرىن تالداۋدىڭ ماڭىزى زور», – دەدى م. اشىمباەۆ.
سونىمەن قاتار سەنات توراعاسى 2021 جىلى ۇلتتىق جاساندى ينتەللەكت پلاتفورماسىنىڭ جۇمىس ىستەۋىنە بايلانىستى زاڭنامالىق دەڭگەيدە بازالىق نورمالار ەنگىزىلگەنىن تىلگە تيەك ەتتى. اتاپ ايتقاندا, اقپاراتتاندىرۋ تۋرالى زاڭدا ۇلتتىق جاساندى ينتەللەكت پلاتفورماسى وپەراتورىنىڭ قۇزىرەتى ايقىندالعان. بۇدان باسقا, مينيسترلىك جاساندى ينتەللەكتىنى دامىتۋدىڭ 2024-2029 جىلدارعا ارنالعان تۇجىرىمداماسىن ازىرلەپ جاتىر.
«مەملەكەت باسشىسى زاڭ شىعارۋ قىزمەتىن تسيفرلاندىرۋدى تاپسىرعانى بەلگىلى. وسىعان بايلانىستى پارلامەنت پالاتالارىندا ءتيىستى جۇمىستار جۇرگىزىلىپ جاتىر. قازىردىڭ وزىندە ناقتى ناتيجەلەر بار. تسيفرلىق ستراتەگيانىڭ جوباسى ازىرلەندى. «ە-پارلامەنت» جوباسى دا ىسكە اسىرىلا باستادى. الداعى ۋاقىتتا وسى ىستە ءبارىمىز بىرلەسىپ ارەكەت ەتۋىمىز كەرەك. سەنات جاساندى ينتەللەكتىنى دامىتۋ ءۇشىن قاجەتتى قۇقىقتىق ورتا قالىپتاستىرۋعا جاردەمدەسۋگە دايىن. وسى باعىتتاعى ءتيىستى جوبالار بويىنشا بىرلەسىپ جۇمىس ىستەيىك», – دەدى سەنات سپيكەرى.
وتىرىس بارىسىندا Data-Management سالاسىنداعى تسيفرلىق شەشىمدەردى رەينجينيرينگتەۋ, زاڭ شىعارۋ ۇدەرىسىنىڭ قازىرگى جاي-كۇيى مەن تسيفرلاندىرۋ ماسەلەلەرى, سونداي-اق زاڭ شىعارۋ سالاسىنداعى ستارتاپتاردىڭ جالپى ترەندتەرى دە تالقىلاندى.
ودان بولەك, ءىس-شارادا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, تسيفرلىق ۇكىمەتتى قولداۋ ورتالىعىنىڭ توراعاسى رۇستەم بيعاري, «ۇلتتىق اقپاراتتىق تەحنولوگيالار» اق توراعاسى روستيسلاۆ كونياشكين, ادىلەت ۆيتسە-ءمينيسترى بەكبولات مولدابەكوۆ, «Astana Hub»-تىڭ باس ديرەكتورى ماعجان ماديەۆ, «Bizdin.ai» كومپانياسىنىڭ باس ديرەكتورى, ايبەك نۇرتازاەۆ, TAG Consulting-ءتىڭ باسقارۋشى سەرىكتەسى ۆالەري گورلاچەۆ, پارلامەنتاريزم ينستيتۋتىنىڭ ديرەكتورى قاناتبەك سافينوۆ تاعى باسقا ساراپشىلار مەن مەملەكەتتىك ورگانداردىڭ وكىلدەرى ءسوز سويلەپ, جاساندى ينتەللەكت سالاسىنداعى جوبالارىن تانىستىردى.