پاراساتتى ۇستاز

ۇستازداردىڭ اراسىندا تەك ءوز جۇمىسىن سۇيەتىن, ودان ءلاز­زات الاتىن, وقۋشىلارى مەن ستۋدەنتتەرىن جاقسى كورگەننەن جاستاردىڭ جالىنىنان قۋات الاتىندارى عانا كۇش-قۋاتىن جو­عالتپايدى. ۇلى اباي: «ۇستاز­دىق ەتكەن جالىقپاس – ۇيرەتۋدەن بالاعا» دەگەندە ناق وسىنداي ۇستازداردى ايتقان. جانار سەر­كەشقىزى, مىنە, وسى قاعيداعا ءدوپ كەلگەن ۇستاز. ول ءوزىنىڭ كوركەم مىنەزىنەن ەشقاشان وزگەرمەي, قاجىماي تالماي, ستۋدەنتتەرىمەن بارىنشا جىلى قارىم-قاتىناس جاساپ كەلەدى. ونىڭ الدىنان شىققان جاستاردىڭ العىستان باسقا ايتارى جوق.

قازىر ول م.قوزىباەۆ اتىن­داعى سولتۇستىك قازاقستان ۋني­ۆەر­سيتەتىنىڭ «قازاق ءتىلى جانە ادەبيەتى» كافەدراسىنىڭ پرو­فەس­سورى, ۋنيۆەرسيتەت رەكتو­رى­نىڭ كەڭەسشىسى, فيلولوگيا عى­لىمدارىنىڭ كانديداتى. كان­­ديداتتىق ديسسەرتاتسياسىن ءال-فارابي اتىنداعى قازاق ۇلت­تىق ۋنيۆەرسيتەتىنىڭ اسپيرانتۋراسىن اياقتاعاننان كەيىن اكادە­ميك مىرزاتاي سەرعا­ليەۆ­تىڭ باس­شىلىعىمەن «عالىم مال­دىباەۆ پوە­زياسىنىڭ كور­كەم­­دىك قۇ­رال­دارى» اتتى تاقى­رىپتا قورعا­عان. ودان بەرى كافەدرا مەڭگەرۋشىسى, ءتىل جا­نە ادە­بيەت ينستي­تۋ­تىنىڭ دي­رەك­­تورى, ودان «رۋ­حاني جاڭ­عى­رۋ» وڭىرلىك جو­بالىق كەڭسەسىنىڭ باسشىسى, پرورەكتور سەكىلدى قىزمەت سا­تىسىنان ءوتىپ, 2022 جىلدان قازىرگى قىز­مەتىن اتقارىپ كەلەدى. باس­شى­لىق, ۇستازدىق قىز­مەت­تەن قول ۇزبەي ءجۇرىپ, 6 مو­نوگ­را­فيا­سىن جا­ريالاعان. بۇ­دان باسقا ول 20 وقۋ جانە وقۋ-ادىس­تەمە­لىك قۇ­رالداردىڭ جارىق كو­رۋى­نە اتسالىسقان, اقش, گەر­ما­نيا, چەحيا, بولگاريا, مولدو­ۆا, بەلارۋس, رەسەي, ۋكراينا, جاپو­نيا ەلدەرىندە بولعان عىلى­مي-پراكتيكالىق كونفەرەن­تسيا ماتەريالدارىندا باياندامالارى جاريالانعان, جالپى سانى 200-دەن استام عىلىمي, 100-گە جۋىق قوعامدىق-ساياسي, مەملەكەتتىك ءتىل ماسەلەلەرىنە قاتىستى ماقا­لالارى شىققان. وسىنىڭ ءبارى ونىڭ بىلىكتى ۇستاز, جاڭاشىل پەداگوگ ەكەنىنىڭ ايعاعى.

ونىڭ جەتەكشىلىگىمەن 40-قا جۋىق ماگيسترلىك ديسسەرتاتسيا قورعالدى. كاسىبي شەبەرلىگىن شىڭداۋ ماقساتىندا بىلىكتىلىكتى ارتتىرۋ كۋرستارىنان ءوتىپ, بىر­نەشە سەرتيفيكات العان. ول ۇلى­­­بريتانيا, پولشا, رە­سەي, تۇر­كيا, قىرعىز ەلدەرىندە عىلى­مي تاعىلىم­دامادان ءوتىپ, «جوعارى وقۋ ورىن­دا­رى­­نىڭ ۇزدىك وقىتۋ­شىسى – 2016» مەم­­لەكەتتىك گرانتىنىڭ يەگەرى بولدى. قوعامدىق جۇمىس­تارمەن دە بەلسەنە اينالىسادى.

ج.تا­لاسپاەۆا – ۇل­كەن شاڭى­راقتىڭ وتاناسى, بالالارى­نىڭ اياۋلى اناسى بولا بىلگەن جان. كاسىپكەر بولىپ ىستەيتىن جۇ­بايى قۋاندىق ەكەۋى تولەگەن, ءدىل­ناز ەسىمدى ۇل-قىز ءوسىرىپ, قازىر استانادا دارىگەر بولىپ ىستەي­تىن ۇلىنان ايشا دەگەن نەمەرە ءسۇيىپ وتىر. ءدىلنازى – ۋنيۆەر­سيتەتتىڭ 2-كۋرس ستۋدەنتى.

«قازىرگى جاستاردىڭ بويىنان قانداي مىنەزدەردى كورەسىز؟» دەگەنىمىزدە, ول: «قازىرگى جاستار اراسىندا دوستىقتى, تۋىسقاندىق قاتىناستى قاجەت ەتپەيتىن, ءوزىم­شىل جاستار كوبەيگەن», دەگەن وكىنىشىن ايتتى. «الايدا قازىر تاۋەلسىز ەلىمىزدىڭ يگىلىگىن كورگەن, جاڭاشا ويلايتىن, 2-3 ءتىلدى ەركىن بىلەتىن ۇرپاق ءوسىپ كەلەدى. ولاردىڭ جوعارى بىلىكتى مامان بولۋعا مۇمكىندىگى دە, الەۋەتى دە جوعارى», دەدى ول سەنىممەن. 

پەتروپاۆل