مەملەكەت باسشىسى قاسىم-جومارت توقاەۆ ساۋد ارابياسى كورولدىگىنىڭ ەنەرگەتيكا ءمينيسترى ابدۋلازيز بەن سالمان ءال ساۋدتى قابىلدادى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
كەزدەسۋ بارىسىندا قازاقستان مەن ساۋد ارابياسى اراسىنداعى ەنەرگەتيكالىق جانە ينۆەستيتسيالىق ىنتىماقتاستىقتى دامىتۋ پەرسپەكتيۆالارى تالقىلاندى.
قاسىم-جومارت توقاەۆ قازاق-ساۋد قاتىناستارىنىڭ بۇرىن-سوڭدى بولماعان دەڭگەيگە جەتكەنىن اتاپ ءوتىپ, ساۋد ارابياسىنىڭ تاق مۇراگەرى, پرەمەر-ءمينيسترى مۇحاممەد بەن سالمان ءال ساۋدپەن اراداعى ۋاعدالاستىقتار بارلىق سەكتوردا ەكىجاقتى ىنتىماقتاستىققا تىڭ سەرپىن بەرگەنىن ەسكە سالدى.
ء«سىزدىڭ ساپارىڭىزدى ەكى مەملەكەت اراسىنداعى دوستىق پەن تىعىز بايلانىستاردىڭ ايقىن كورىنىسى رەتىندە قاراستىرامىز. مەن ءسىزدىڭ عاجايىپ ەلىڭىزگە جاساعان ساپاردان ەستەن كەتپەس اسەر الدىم. ساپار, شىن مانىندە, تابىستى بولدى. ءبىز كوپتەگەن ماسەلە بويىنشا, اسىرەسە, ەنەرگەتيكا سەكىلدى ماڭىزدى سالادا ىنتىماقتاستىق ورناتۋ تۋرالى ۋاعدالاستىقتارعا قول جەتكىزدىك. ەكىجاقتى قارىم-قاتىناستىڭ بولاشاعى جارقىن بولاتىنىنا سەنىمدىمىن. ءوزارا ىنتىماقتاستىعىمىز ستراتەگيالىق سيپاتقا يە. وسى مۇمكىندىكتى پايدالانا وتىرىپ, جوعارى مارتەبەلى مۇحاممەد بەن سالمانعا ىزگى تىلەگىمدى جولداعىم كەلەدى», دەدى مەملەكەت باسشىسى.
ابدۋلازيز بەن سالمان ءال ساۋد قۇرمەت كورسەتكەنى ءۇشىن قاسىم-جومارت توقاەۆقا العىس ايتتى.
ء«بىز قازاقستانمەن اراداعى تاريحي تامىرى تەرەڭ قارىم-قاتىناستى جوعارى باعالايمىز. قازاقستان تاۋەلسىزدىگىن العان كەزدە ساۋد ارابياسى كومەك قولىن سوزعان العاشقى ەلدەردىڭ ءبىرى بولدى», دەدى مينيستر.
بۇدان بولەك, كەزدەسۋگە قاتىسقان ساۋديانىڭ ACWA Power كومپانياسى ديرەكتورلار كەڭەسىنىڭ توراعاسى مۇحاممەد ابۋنايان جەتىسۋ وبلىسىندا قۋاتى 1 گۆت بولاتىن جەل ەلەكتر ستانتسياسىن سالۋ جونىندەگى بىرلەسكەن ينۆەستيتسيالىق جوبانىڭ پەرسپەكتيۆالارى, سونداي-اق قازاقستانمەن «جاسىل» ەنەرگەتيكا سالاسىنداعى ءوزارا ىقپالداستىق جوسپارى جايىندا ايتتى.كەزدەسۋ سوڭىندا قازاقستان رەسپۋبليكاسىنىڭ ۇكىمەتى مەن ساۋد ارابياسى كورولدىگىنىڭ ۇكىمەتى اراسىندا جەل ەلەكتر ستانتسياسىن سالۋ جونىندەگى بىرلەسكەن جوبانى ىسكە اسىرۋ تۋرالى كەلىسىمگە قول قويىلدى.