ۇكىمەت باسشىسى پاۆلودار مۇناي-حيميا زاۋىتىنىڭ جاڭعىرتۋ جوسپارىمەن تانىستى

ۇكىمەت باسشىسى پاۆلودار مۇناي-حيميا زاۋىتىنا بارىپ, ونىڭ قازىرگى جۇمىسىمەن جانە ءوندىرىستى ودان ءارى جاڭعىرتۋ جوسپارلارىمەن تانىستى. باسىم جوبالاردىڭ ءبىرى – تەحنولوگيالىق قوندىرعىلار جۇمىسىنىڭ توقتاۋسىز جوندەۋارالىق كەزەڭىنە كوشۋ.

بۇگىنگى تاڭدا پمحز جىلىنا شامامەن 6 ملن توننا مۇناي وڭدەيدى. شىعارىلاتىن ونىمدەردىڭ ىشىندە اۆتوموبيل بەنزينىنىڭ ءارتۇرلى ماركالارى, ديزەل وتىنى, مازۋت, بيتۋم, كوممۋنالدىق-تۇرمىستىق گازدار جانە ت.ب. بار.

ولجاس بەكتەنوۆتىڭ ايتۋىنشا, مەملەكەت باسشىسى قاسىم-جومارت توقاەۆ ىشكى نارىقتى وتىنمەن قامتاماسىز ەتۋ بويىنشا ۇكىمەت الدىنا ناقتى مىندەتتەر قويدى. وسىعان بايلانىستى مۇناي وڭدەۋ زاۋىتتارى مۇناي ونىمدەرىنىڭ بۇكىل جەلىسى بويىنشا ءوندىرىس كولەمىن ۇلعايتۋ ءۇشىن بارلىق شارالار كەشەنىن ىسكە اسىرۋى قاجەت.

وتاندىق ەكونوميكانى دامىتۋ ءۇشىن جول قۇرىلىسىنىڭ ماڭىزىن ەسكەرە وتىرىپ, پمحز-دا بيتۋم وندىرەتىن پەشتىڭ قۇرىلىسى اياقتالدى, بۇل ونىڭ ءوندىرىسىن 15%-عا ارتتىرۋعا مۇمكىندىك بەردى.

پرەمەر-مينيستر زاۋىت باسشىلىعىنا جۇمىس قارقىنىن ارتتىرۋ قاجەت ەكەنىن, بۇل رەتتە مەملەكەت تاراپىنان قولداۋ كورسەتىلەتىنىن اتاپ ءوتتى.

جالپى وتكەن جىلدىڭ قورىتىندىسى بويىنشا «قازمۇنايگاز» كومپانياسىنىڭ ءموز-ىندە قايتا وڭدەۋ كولەمى 20%-عا – جىلىنا 14,2 ملن توننادان 16,6 ملن تونناعا دەيىن ۇلعايدى. مۇنايدى وڭدەۋ تەرەڭدىگى رەكوردتىق 86%-عا جەتتى, ال جەڭىل مۇناي ونىمدەرىن شىعارۋ 72%-عا دەيىن ءوستى. اۆتوموبيل بەنزيندەرى ءوندىرىسىن 80%-عا جانە ديزەل وتىنى ءوندىرىسىن 30%-عا ۇلعايتۋ ەسەبىنەن ىشكى نارىقتىڭ قاجەتتىلىگى تولىعىمەن قامتاماسىز ەتىلدى.

ء«بىزدىڭ الدىمىزدا قايتا وڭدەۋ تەرەڭدىگىن ودان ءارى ارتتىرۋ مىندەتتەرى تۇر. اتاپ ايتقاندا, پمحز-دا ديزەل وتىنىن گيدروتازارتۋ جوباسى ىسكە اسىرىلىپ جاتىر, ول كاسىپورىنعا -38 گرادۋستا قاتاتىن 160 مىڭ تونناعا جۋىق ديزەل شىعارۋعا مۇمكىندىك بەرەدى. وتىننىڭ بۇل ءتۇرى رەسپۋبليكانىڭ سولتۇستىك ايماقتارىندا ەرەكشە سۇرانىسقا يە», دەدى قمگ باسقارما توراعاسى ماعزۇم مىرزاعاليەۆ. 

سونىمەن قاتار ۇكىمەت باسشىسى ۇساقتالعان پوليپروپيلەن جانە باسقا دا پوليمەر بۇيىمدارىن شىعاراتىن «نەفتەحيم LTD» كاسىپورنىنىڭ جۇمىسىمەن تانىستى. مۇندا پمحز-دان جەتكىزىلەتىن سۇيىتىلعان مۇناي گازىن وڭدەۋدەن باستاپ دايىن ونىمگە دەيىن ءوندىرىستىڭ تولىق تسيكلى جۇزەگە اسىرىلدى. ءوز كەزەگىندە ول ىشكى نارىقتا, سونداي-اق قىرعىزستاندا, رەسەيدە, تاجىكستاندا جانە وزبەكستاندا جوعارى سۇرانىسقا يە.

ولجاس بەكتەنوۆ پاۆلودار وبلىسىندا مۇناي-حيميا كلاستەرىن دامىتۋ ءۇشىن بارلىق جاعداي جاسالعانىن اتاپ ءوتتى. اتاپ ايتقاندا, «نەفتەحيم LTD» زاۋىتى پوليپروپيلەن ونىمدەرىن يمپورتتاۋ ماسەلەسىن شەشىپ قانا قويماي, سونداي-اق وتىنعا قوسپا تۇرىندە ەكسپورتتالاتىن جاڭا باعىتتى يگەردى.

ۇكىمەت باسشىسى ەنەرگەتيكا مينيسترلىگىنە ءارى قاراي ءوندىرىستى ۇلعايتۋ ءۇشىن كاسىپورىندى شيكىزاتپەن قامتاماسىز ەتۋ ماسەلەسىن مۇقيات پىسىقتاۋدى تاپسىردى.