الماتىدا دوستىق ۇيىندە ۇلتتىق عىلىم اكادەمياسىنىڭ ۇيىمداستىرۋىمەن ەلىمىزدىڭ عىلىم سالاسىن جاڭعىرتۋ ماسەلەرىنە ارنالعان دوڭگەلەك ۇستەل ءوتتى, دەپ حابارلايدى Egemen.kz.
ءىس-شاراعا سالالىق جانە قوعامدىق اكادەميالار باسشىلارى قاتىستى.
القالى جيىندى جۇرگىزگەن ۇلتتىق عىلىم اكادەمياسىنىڭ پرەزيدەنتى ا. كۇرىشباەۆ مەملەكەت باسشىسىنىڭ ۇلتتىق عىلىم اكادەمياسىن رەفورمالاپ, ونىڭ بۇگىنگى زامان تالابىنا ساي ميسسياسى مەن مىندەتتەرىن قايتا ايقىنداۋدى قولداپ وتىرعانىنا باسا نازار اۋداردى.
«مەملەكەت باسشىسى ق. توقاەۆ عىلىم سالاسىن دامىتۋعا اسا زور كوڭىل ءبولىپ وتىر. سونىڭ ناتيجەسىندە جاڭادان عىلىم جانە جوعارى ءبىلىم مينيسترلىگى, پرەزيدەنت جانىنداعى عىلىم مەن تەحنولوگيالار كەڭەسى قۇرىلدى. ۇلتتىق عىلىم اكادەمياسىنا جاڭا مارتەبە بەرىلىپ, عىلىم سالاسىن قارجىلاندىرۋ 3 ەسەگە ارتتى. عىلىم سالاسىنا كورسەتىلگەن قولداۋ عالىمدار قاۋىمداستىعىنا ۇلكەن مىندەتتەر جۇكتەيدى جانە ونى ويداعىداي جۇزەگە اسىرۋ ءۇشىن «بىرلىك بار جەردە تىرلىك بار» نەمەسە «بىرلەسە كوتەرگەن جۇك جەڭىل» دەگەن قاعيدالاردى باسشىلىققا الا وتىرىپ, ءبىر جاعادان باس, ءبىر جەڭنەن قول شىعارىپ ەڭبەك ەتۋگە ءتيىستىمىز. وسى ورايدا ۇلتتىق عىلىم اكادەمياسىن تاۋەلسىز, اكىمشىلىك ەمەس, مينيسترلىكتەردىڭ مىندەتتەرىن قايتالامايتىن, ۇكىمەتكە ساراپتامالىق تۇجىرىمدار بەرەتىن جانە فورسايتتىق ىزدەنىستەر جانە دە تەحنولوگيالىق بولجامدار نەگىزىندە وتاندىق عىلىمنىڭ ستراتەگيالىق دامۋ باعىتتارىن انىقتايتىن ورگانعا اينالدىرۋ مىندەتى تۇر. سونداي-اق عىلىمي ىزدەنىستەردىڭ الەمدەگى الدىڭعى قاتارلى عىلىمي ورتالىقتارى مەن مەكتەپتەرىنىڭ تاجىريبەسىنە نەگىزدەلگەن جاڭا فورماتىن ۇسىناتىن بولامىز. ۇلتتىق عىلىم اكادەمياسى ەلىمىزدىڭ عىلىمىنىڭ ينتەگراتسيالانعان جۇيەسىن قۇرىپ, مەملەكەتىمىزدىڭ عىلىم الەۋەتىنىڭ قورىن قۇراتىن بولادى. سونىمەن قاتار عىلىم سالاسىنا جاس تالانتتاردى تارتۋعا مەيلىنشە ىقپال ەتەدى», دەدى ءوز سوزىندە ا. كۇرىشباەۆ.
جيىن بارىسىندا قازاقستان عالىمدار وداعىنىڭ پرەزيدەنتى ءورازالى سابدەن, «قازاقستان ەكونوميكالىق عالىمدار اكادەمياسىنىڭ» پرەزيدەنتى راحمان الشانوۆ, «قازاقستان ۇلتتىق جاراتىلىستانۋ عالىمدار اكادەمياسىنىڭ» ءبىرىنشى ۆيتسە-پرەزيدەنتى ۆلاديمير شكولنيك, اۋىلشارۋاشىلىعى عىلىمدارى اكادەمياسىنىڭ پرەزيدەنتى تىلەكتەس ەسپولوۆ, «حالىقارالىق رەپرۋدۋكتولوگيا اكادەمياسىنىڭ» پرەزيدەنتى ۆياچەسلاۆ لوكشين, تاعى دا باسقا سالالىق اكادەميالاردىڭ وكىلدەرى, عالىمدار ۇلتتىق عىلىم اكادەمياسىن رەفورمالاۋ قادامدارىنا قولداۋ بىلدىرە وتىرىپ, عىلىم سالاسىن دامىتۋ مەن زامان تالابىنا ساي جوعارى دەڭگەيگە كوتەرۋگە باعىتتالعان ناقتى ۇسىنىستارىن ءبولىستى.
وسى ورايدا عىلىمدى دامىتۋدىڭ وزەكتى ماسەلەلەرىن كوتەرگەن عالىمدار «عىلىم جانە تەحنولوگيالىق ساياسات تۋرالى» زاڭ جوباسىن جەتىلدىرۋ, عىلىمي جوبالاردى, ونەرتابىستاردى وندىرىسكە ەنگىزۋ, عالىمداردىڭ مارتەبەسىن كوتەرۋ مەن قارجىلاندىرۋعا قاتىستى تۇششىمدى ويلارىن ورتاعا سالدى. عىلىمدا سوڭعى وتىز جىل ىشىندە قوردالانعان كوپتەگەن ماسەلەنى اكادەميا باسشىلارى كوتەرە وتىرىپ, وسى ىستە ۇعا تاراپىنان ماڭىزدى ءارى مازمۇندى قادامداردىڭ جۇزەگە اساتىنىنا سەنىم ءبىلدىردى. تۇيتكىلدى ماسەلەلەر قاتارىندا ينفرقۇرىلىم, زەرتحانالىق مۇمكىندىكتەر, بولىنگەن قارجىنى ءتيىمدى يگەرۋگە قاتىستى جايتتار باسشىلىققا الىندى.
جيىن سوڭىندا ۇلتتىق عىلىم اكادەمياسى مەن سالالىق جانە قوعامدىق اكادەميالار ءوزارا تۇسىنىستىك جانە ىنتىماستىق مەموراندۋمىنا قول قويدى.
الماتى