ۇكىمەت باسشىسى ەكىباستۇز جەو-سىن جاڭعىرتۋ جۇمىستارىن تەكسەردى

ولجاس بەكتەنوۆ كوممۋنالدىق-ەنەرگەتيكالىق سەكتوردى جاڭعىرتۋ جۇمىستارىنىڭ بارىسىمەن جانە تۇرعىنداردى جىلۋمەن ۇزدىكسىز قامتاماسىز ەتۋ شارالارىمەن تانىستى.

ەكىباستۇز جەو-دا ءوڭىر اكىمى اسايىن بايحانوۆ ۇكىمەت باسشىسىنا جىلۋمەن قامتۋ جۇيەسىن قالپىنا كەلتىرۋ اياسىندا بارلىق 10 قازاندىققا كۇردەلى جوندەۋ جۇمىستارى جۇرگىزىلگەنىن حابارلادى. ستانسا كورسەتىلگەن پارامەترلەرگە سايكەس قالىپتى قۋاتىندا جۇمىس ىستەپ تۇر. سونىمەن قاتار 4 جىلۋ ماگيسترالى مەن ورامىشىلىك جەلىلەر دە كۇردەلى جوندەۋدەن ءوتتى. 

قازىرگى تاڭدا ەكىباستۇزدىڭ جىلۋمەن جابدىقتاۋ جۇيەسىنە تەحنيكالىق اۋديت جۇرگىزىلىپ جاتىر. 4 كەزەڭنىڭ 3 كەزەڭى اياقتالدى, جىل سوڭىنا دەيىن بارلىق ماگيسترالدى جەلىلەردى تسيفرلاندىرۋ اياقتالادى.

پرەمەر-مينيستر ەكىباستۇزدىڭ جىلۋمەن جابدىقتاۋ جۇيەسىن قالپىنا كەلتىرۋ پروتسەسىن جالعاستىرۋ قاجەت ەكەنىن اتاپ ءوتتى. ۇكىمەت تاراپىنان تولىقتاي قولداۋ كورسەتىلەدى.

ء«بىز ەكىباستۇزدىڭ 2022 جىلدىڭ قىسىندا قانداي قيىنشىلىقتى باستان وتكەرگەنىن بىلەمىز. مەملەكەت باسشىسىنىڭ تاپسىرماسى بويىنشا ۇكىمەت رەزەرۆىنەن جىلۋمەن جابدىقتاۋ جەلىلەرىن جوندەۋگە جانە جىلۋ ەلەكتر ورتالىعىن جاڭعىرتۋعا 16,4 ملرد تەڭگە ءبولىندى. مەنشىك يەلەرىمەن بىرلەسىپ, جىلۋ ورتالىعىنىڭ تۇراقتى جۇمىسىن قامتاماسىز ەتۋ بويىنشا شارالار قابىلداندى. بارلىق قازاندىقتار جوندەۋدەن ءوتتى. قالانىڭ جىلۋ جەلىلەرىن جاڭعىرتۋ بويىنشا اۋقىمدى جۇمىستار جۇرگىزىلدى. جۇمىس قارقىنىن ارتتىرىپ, جىلۋ جەلىلەرى مەن جىلۋ كوزدەرى جابدىقتارىنىڭ توزۋىن ازايتۋ قاجەت», دەدى ولجاس بەكتەنوۆ.

سونداي-اق ءوڭىر اكىمى وبلىستىڭ ءۇش قالاسىندا جوندەۋ ناۋقانىنىڭ جوسپارىن ۇسىندى. ەكىباستۇز قالاسى بويىنشا تم-I جانە تم-III جىلۋ ماگيسترالدارىن كۇردەلى جوندەۋدىڭ جوبالاۋ-سمەتالىق قۇجاتتاماسى ازىرلەندى. ءبىرىنشى كەزەكتە سۋ جىلىتۋ تسەحىن كۇل شىعارۋ جۇيەسىمەن قامتاماسىز ەتۋ ءۇشىن تازارتىلعان سۋ قۇبىرىن سالۋ قاجەت. ەكىباستۇزداعى كارىز كوللەكتورى مەن مايقايىڭ سۋ قۇبىرىن كۇردەلى جوندەۋ جوبالارى ازىرلەندى. پاۆلوداردا تم-13 قۇرىلىسى, ال اقسۋ قالاسىندا ورامىشىلىك جىلۋ جەلىلەرى كۇردەلى جوندەۋدى قاجەت ەتەدى.

سونداي-اق پرەمەر-مينيستر «پرومماشكومپلەكت» جشس تەمىرجول دوڭگەلەكتەرىن شىعارۋ كاسىپورنىنىڭ قىزمەتىمەن تانىستى. اتالعان زاۋىت – 2012 جىلدان بەرى جۇمىس ىستەيدى جانە قازاقستاندا وسىنداي ءونىم شىعاراتىن جالعىز كاسىپورىن. ونىڭ اسسورتيمەنتى حالىقارالىق ستاندارتتارعا سايكەس كەلەتىن لوكوموتيۆتەرگە, جۇك جانە جولاۋشىلار ۆاگوندارىنا ارنالعان تەمىرجول دوڭگەلەكتەرىنىڭ 400-دەن استام ءتۇرىن قامتيدى.

قۋاتتىلىعى جىلىنا 300 مىڭ بىرلىك ءونىم شىعاراتىن كاسىپورىندى ىسكە قوسۋ ەكىباستۇزدا تولىققاندى تەمىرجول كلاستەرىن قۇرۋعا جانە يمپورتتى الماستىرۋعا ەلەۋلى ۇلەس قوسۋعا مۇمكىندىك بەردى. زاۋىت رەسپۋبليكانىڭ قتج جانە ونەركاسىپتىك كاسىپورىندارىنىڭ قاجەتتىلىكتەرىن ءىشىنارا وتەيدى, سونداي-اق ءونىمدى ازەربايجان, قىرعىزستان, رەسەي, تاجىكستان جانە وزبەكستانعا جەتكىزەدى. سونداي-اق ەۋروپالىق نارىققا ارنالعان دوڭگەلەكتەر ءوندىرىسىن مەڭگەرۋ جوسپاردا بار. قازىرگى ۋاقىتتا تەحنيكالىق قۇجاتتاما دايىندالىپ, ءوندىرىس پروتسەسى ۇيىمداستىرىلىپ جاتىر.

ولجاس بەكتەنوۆ مەملەكەت تەمىرجول سالاسىن دامىتۋعا ەرەكشە كوڭىل ءبولىپ وتىرعانىن اتاپ ءوتتى, ويتكەنى بارلىق جۇك اينالىمىنىڭ شامامەن 70%-ى جانە جولاۋشىلار تاسىمالىنىڭ 60%-عا جۋىعى تەمىر جولداردىڭ ۇلەسىنە تيەسىلى.

«بۇل – ورتالىق ازيادا بالاماسى جوق بىرەگەي كاسىپورىن. سىزدەردە تۇراقتى تاپسىرىستار بار. ءوندىرىس قۋاتىن ارتتىرۋ ءۇشىن مۇمكىندىكتەر جەتكىلىكتى. اتالعان زاۋىتتىڭ تولىق جۇكتەلۋىن قامتاماسىز ەتۋ ماڭىزدى», دەدى پرەمەر-مينيستر.

ۇكىمەت باسشىسى ۇلتتىق تاسىمالداۋشىنىڭ سۇرانىسى نەگىزىندە ءونىمدى جەتكىزۋ بويىنشا ۇزاقمەرزىمدى كەلىسىمشارتتار جاساي وتىرىپ, قتج-مەن ءوزارا ءىس-قيمىلدى كۇشەيتۋ مۇمكىندىكتەرىن پىسىقتاۋدى تاپسىردى.