11 ناۋرىزدا قاسيەتتى رامازان ايى باستالادى. اۋىز بەكىتۋگە نيەت ەتۋشىلەر ورازاعا دايىندىق امالدارىن جاساپ, ونىڭ شارتتارىن بىلگەن ابزال. وسى ماقساتتا قازاقستان مۇسىلماندارى ءدىني باسقارماسى ءدىني وڭالتۋ ءبولىمىنىڭ باسشىسى حاسان امانقۇلدان ورازا ۇستاۋشىلار اراسىندا ءجيى قويىلاتىن ساۋالداردىڭ جاۋابىن سۇراپ بىلدىك, دەپ جازادى Egemen.kz.
قمدب وكىلىنەن ورازا ۇستاۋ بارىسىندا كوڭىلدە كۇمان تۋدىراتىن, العاش رەت اۋىز بەكىتۋگە نيەت ەتكەن جاندار ءۇشىن ماڭىزدى ءىس-ارەكەتتەردىڭ انىق-قانىعىن بىلدىك.
فوتو:ء مۇفتيات قمدب youtube ارناسى
- تۇكىرىك, قاقىرىق جۇتقاندا ورازا بۇزىلا ما؟ اۋىزدى سالقىن سۋمەن شايۋعا رۇقسات پا؟
- تۇكىرىك, قاقىرىق جۇتۋ ورازانى بۇزبايدى. بىراق ادەيى تۇكىرىگىن اۋزىنا جيناپ ىشكە جۇتۋ – ماكرۋھ. اۋىزدى سالقىن سۋمەن شايۋعا رۇقسات بەرىلەدى, بىراق ول دا ماكرۋھ سانالادى. سوندىقتان مۇنداي ىستەردەن بارىنشا ساقتانعان ءجون.
- سارەسىنە تۇرا الماي قالسا قاي ۋاقىتقا دەيىن اۋىز بەكىتۋگە بولادى؟ ورازانى جالعاستىرۋعا بولا ما؟
- سارەسىنە تۇرا الماسا, ورازاسىن سارەسىز ءارى قاراي جالعاستىرا بەرەدى. سەبەبى ورازا ۇستايتىن ادامعا تاڭ اتقاننان كەيىن جەپ-ىشۋگە بولمايدى.
- دارەت الماي اۋىز اشۋعا بولا ما؟
- ناماز وقۋ ءۇشىن دارەت الادى. ورازانىڭ سارەسى نەمەسە اۋىزاشارى ءۇشىن دارەت الۋ شارت ەمەس.
- ورازا ۇستاعان ادامدار بەلگىلى سەبەپتەرمەن اۋىزدارىن اشىپ جاتادى. اسىلىندا اۋىزدى قانداي سەبەپتەرمەن اشۋعا بولادى؟
- ورازا ۇستاي المايتىن دارەجەدە ناۋقاستانىپ قالعان ادامعا, ءالسىز قارت ادامعا, جولاۋشىعا ورازاسىن اشۋعا رۇقسات ەتىلەدى.
- قادىر ءتۇنىن تاڭعا دەيىن ۇيقىسىز وتكىزۋ شارت پا؟
- قادىر ءتۇنىن قۇلشىلىقپەن ۇيقىسىز وتكىزۋ – مۇستاحاپ, ياعني ەرىكتى عيبادات. ەشبىر ادامعا ءتۇندى ۇيىقتاماي وتكىزۋدى مىندەتتەۋ دۇرىس ەمەس.
- وقۋشىلارعا ورازا ۇستاۋعا بولا ما؟
- شاريعات بويىنشا دەنى ساۋ ادام ورازا ۇستاۋعا مىندەتتى. ال باليعات جاسىنا تولماعان بالاعا قۇلشىلىق جاساۋ, ونىڭ ىشىندە ورازا ۇستاۋ شارت ەمەس.
- جاۋابىڭىزعا راقمەت!