وتاندىق عالىمنىڭ ەلەۋلى جاڭالىعى

شىمكەنتتىك عالىم ابدى­ما­لىك ءاشىروۆ ەشبىر تىڭايتقىش پايدالانباي استىق ونىمدىلىگىن 50 پايىزعا ارتتىراتىن ءتاسىل تاپتى. ارنايى قۇرىلعىنىڭ كومەگىمەن وڭدەلگەن تۇقىم مول ءونىم بەرەدى ءارى ساپاسى جوعارى. عىلىمي زەرتتەۋ بويىنشا كەز كەلگەن ءداندى داقىلدىڭ تۇقىمى جەرگە سەبۋدەن ءبىر اي بۇرىن وڭدەۋدەن ءوتۋى قاجەت. تۇقىمدى 14 گەرتس جيىلىكتەگى 12 ۆولت قۋاتپەن ساۋلەلەندىرەدى. پايداسى مول بۇل ۇدەرىس نەبارى 15 مينۋت جۇرەدى. وسى ۋاقىت ىشىندە تۇقىم ساقتالعان قامباداعى ديامەترى 20 مەتر اۋماق بيورەزونانستى جولمەن اكتيۆتەندىرۋ كەرەك. ءتاسىلدىڭ باس­تى ەرەكشەلىگى – قورشاعان ورتاعا, توپىراققا زيان تيگىزبەي, مول ءونىم بەرىپ, مۋتاتسيالىق وزگەرىس­­تەرگە ۇشى­را­مايدى.

– الفا, بەتتا ومەلوگانى 30 پا­يىزعا كوبەيتكەن كەزدە ءداننىڭ ىشىن­دە گيدروليز جۇرەدى. كراحمال مەن گيكسترينى بار ءدان ىشىندە گليۋكوزا مەن فرۋكتوزاعا اينالادى, – دەيدى عالىم.

عىلىمي جوبا وسىدان بەس جىل بۇرىن عىلىم قورىنىڭ قولداۋى ارقاسىندا 200 ميلليون تەڭگە گرانت­قا يە بولعان. سولاي 18 ءتۇرلى ءداندى داقىل شارۋاشىلىقتاردا سىناق­تان وتكىزىلگەن. ال ناتي­جە­سى­ن­دە القاپتارداعى ءونىم 30-50 پايىزعا ارتقان.

– ءۇش جىلدىڭ ىشىندە 128 شارۋا­شىلىقتا جۇمىس ىستەپ ءوزىمىزدىڭ تەحنو­لوگيامىزدى دالەلدەدىك. قازىر 7 وبلىس­تا جۇمىس ىستەپ جاتىرمىز. مەنىڭ توبىمدا 18 ادام بار, – دەيدى ابدىمالىك ءاشىروۆ.

وتاندىق عالىمنىڭ ەرەكشە جاڭا­­لىعى وسىعان دەيىن الەمنىڭ 10 ەلىن­دە سىناقتان ءوتتى. جاقىندا ليتۆا مەن پولشا ەلىنىڭ شارۋالارى دا قولدانباق. ءتىپتى قىتايمەن دە كەلىسىم جاسالدى. عىلىمي جاڭالىق 2017 جىلى Forbes جۋرنالىنىڭ نۇسقاسى بويىنشا ۇزدىك 10 يننوۆاتسيالىق جوبانىڭ قاتارىنا ەندى.