ەلوردانىڭ «جاستار» تەاترىندا قازاقستاننىڭ حالىق جازۋشىسى, دراماتۋرگ, مەملەكەتتىك سىيلىقتىڭ لاۋرەاتى ساكەن ءجۇنىسوۆتىڭ 90 جىلدىعىنا ارنالعان «سۇلۋ ءسوزدىڭ سۇلەيى» اتتى ادەبي-سازدى كەش ءوتتى. تاعىلىمدى ءىس-شاراعا عالىمدار, اقىن-جازۋشىلار مەن ونەر مايتالماندارى قاتىستى.
كەش شىمىلدىعى ءانشى ساۋلەجان تاقزيانىڭ ورىنداۋىنداعى ساكەن سەيفۋلليننىڭ «تاۋ ىشىندە» انىمەن اشىلدى. سەرىلىك سالتاناتىندا ساناتتاس ءارى اتتاس ساكەن اعاسىنىڭ ءانى جازۋشىنىڭ جانىن ءدال سۋرەتتەپ, بولمىس بوياۋىن انىق كورسەتەتىندەي كورىندى. بالكىم, وسى سەبەپتەن كورەرمەن قاۋىم انمەن بىرگە اۋەلەپ, انشىمەن بىرگە شىرقاپ وتىردى.
ادەبي-سازدى كەش ءارى قاراي اۆتوردىڭ «جارالى گۇلدەر» پەساسىنىڭ جەلىسىمەن قويىلعان رەجيسسەر, مەملەكەتتىك سىيلىقتىڭ لاۋرەاتى نۇرقانات جاقىپبايدىڭ «تىراۋ-تىراۋ, تىرنالار» دراماسىنا ۇلاستى. سوعىس جىلدارىنداعى قايعى-قاسىرەتتى كورسەتكەن قويىلىم ءۇزىندىسى كوپشىلىكتىڭ كوڭىلىن تولقىتتى, جۇرەگىن تەبىرەنتتى.
ال ايتىسكەر اقىن مەيىربەك سۇلتانحان ساكەن ءجۇنىسوۆتىڭ قالامگەرلىك, قايراتكەرلىك پورترەتىن, ونەگەلى عۇمىرىن ولەڭمەن ورنەكتەدى. «قۇلاگەردى جوقتاعان اقان بولسا, اقاندى جوقتاتپاعان ساكەن سەرى!» دەيدى ول.
قازاقستان جازۋشىلار وداعى باسقارما توراعاسىنىڭ ورىنباسارى, اقىن باۋىرجان جاقىپ ءسوز الىپ, ساكەن ءجۇنىسوۆتىڭ سانقىرلىلىعىنا ەرەكشە توقتالدى.
«ول كىسىنى كوزىمىز كوردى. قاناتتاس ءىنىسى بولىپ قاتار جۇردىك. الماتىدا مۇحتار اۋەزوۆ اتىنداعى ۇلتتىق تەاتردا وتكەن مەرەيتويىندا ساكەن اعانىڭ يتاليا تىلىندە شىرقاعان ارياسىنا تاڭدانباعان, تامسانباعان ادام قالمادى. ال ونىڭ دراماتۋرگياداعى, اۋدارما سالاسىنداعى ءونىمدى ەڭبەگى ءالى دە ۇلكەن زەرتتەۋلەردى تالاپ ەتەدى. سوندىقتان ەلى باردا وسىنداي ەردىڭ ەسىمى ەشقاشان ۇمىتىلماق ەمەس. ول قازاق حالقىمەن بىرگە جاسايدى», دەدى ول. اقىن ودان كەيىن جازۋشىعا ارناعان ولەڭىن وقىدى.
ال اقىن, ماناسشى بايانعالي ءالىمجانوۆ ساكەن ءجۇنىسوۆتىڭ شىعارماشىلىعىنا توقتالىپ, ونىڭ بيىك دەڭگەيدەگى ازاماتتىق بولمىسىن باسا ايتتى.
«60-جىلدارى قازاق ادەبيەتى اسپانىندا نەبىر جۇلدىزدار جاندى. الايدا سول جۇلدىزداردىڭ ىشىندە ەڭ جارىعى ساكەن اعام ەدى. ول كىسى ادەبيەتكە جارق ەتىپ, «جاپانداعى جالعىز ۇيمەن» كەلدى. ودان كەيىن «اقان سەرىنىڭ» ەكى تومىن جانە «اماناي مەن زامانايىن» بەردى. بۇل – قازاق ادەبيەتىنىڭ قازىناسىنا قوسقان اعامىزدىڭ ەڭ ۇلكەن تارتۋى. ساكەندى زامانداستارى تەنتەك دەيدى. بىراق ول – ەستى تەنتەك ەدى. سوزگە توقتايتىن ءۋالى ازامات ەدى. بىردە سەيىتجان وماروۆ دەيتىن جازۋشىمەن ساكەن ءجۇنىسوۆ سوزگە كەلىپ قالادى. تابيعاتىنان مومىن سەيىتجان اقساقال ەش داۋىس كوتەرمەيدى. تەك قانا ء«اي, ساكەن... تابيعاتتىڭ زاڭى بويىنشا مەن سەنەن ەرتەرەك كەتەمىن عوي. سوندا اكەڭ نۇرماققا ايتارمىن, ساكەن مەنى رەنجىتتى دەپ», دەيدى. وسى سوزدەن كەيىن اعامىز قاتەسىن ءتۇسىنىپ, بىردەن كەشىرىم سۇراعان ەكەن. كەيىن وسى وقيعاسىن ولە-ولگەنشە ونەگە بولسىن دەپ ايتىپ ءجۇردى جارىقتىق», دەدى ب.ءالىمجانوۆ.
ماعجان جۇماباەۆ اتىنداعى اقمولا وبلىستىق امبەباپ عىلىمي كىتاپحاناسىنىڭ ديرەكتورى قۋانىش وسپانوۆ كىتاپحانادا ساكەن ءجۇنىسوۆ اتىنداعى ءماجىلىس زالى اشىلاتانىن حابارلادى. اقجولتاي جاڭالىققا قازاقستان جازۋشىلار وداعىنىڭ استانا قالاسىنداعى فيليالىنىڭ ديرەكتورى داۋلەتكەرەي كاپ ۇلى ءۇن قوسىپ, كىتاپحاناعا ايگىلى فوتوگراف شۇكىر شاحاي تۇسىرگەن جازۋشىنىڭ جيىرما سۋرەتىن سىيعا تارتاتىن بولدى. سونىمەن قاتار ساكەن ءجۇنىسوۆتىڭ 90 جىلدىعىنا وراي ۇلتتىق اكادەميالىق كىتاپحانادا عىلىمي كونفەرەنتسيا دا وتەتىنىن حابارلادى.
كەش سوڭىندا قالامگەردىڭ قارىنداسى روزا ءجۇنىسوۆا اق تىلەگىن ايتىپ, جيىلعان قاۋىمعا العىسىن ءبىلدىردى. سالتاناتتى ءىس-شارانىڭ وتۋىنە مۇرىندىق بولعان جازۋشىلار وداعى استانا فيليالى مەن استانا قالاسى اكىمدىگى ونەرپازداردى ىقىلاس گ ۇلىمەن قۇتتىقتادى.