باق وكىلدەرىمەن كەزدەستى

اكىم جۋرناليستەرگە وبلىستىڭ الەۋ­مەتتىك-ەكونوميكالىق دامۋ بارىسى, «Qyzyljar» اەا قادامدارى, الەۋ­­مەتتىك جانە باسقا ماسەلەلەر جو­نىندە تولىق اقپارات بەردى. بىل­تىر تەك اۋىل شارۋاشىلىعى عانا بەل­گىلەنگەن مەجەنى ورىنداي الماعان, قال­عان سالانىڭ ءبارى دە جوسپاردى اسىرا ورىن­داپ, ەكونوميكانىڭ دامۋ قار­قىنىن قامتاماسىز ەتكەن. ال 2024 جىلى 551,9 ملرد تەڭگەگە 11 ينۆەس­تي­تسيا­لىق جوبانى ىسكە اسىرۋ بەلگىلەنگەن.

بايانداماسىن اياقتا­عاننان كەيىن ع.نۇرمۇحامبەتوۆ جۋرناليستەردىڭ سۇراقتارىنا جاۋاپ بەردى. سونىڭ ىشىندە قارعىن سۋعا قامدانۋ ماسەلەسىندە پە­تروپاۆل قالاسى اكىمدىگىنىڭ سال­عىرتتىق تانىتىپ وتىرعانىن ايتتىق. ويتكەنى جەكەمەنشىك ۇيلەردىڭ كوپ اۋداندارىندا اۋلادان شىعارىلعان قار تاۋداي بولىپ ءۇيىلىپ, تاسىلىپ اكەتىلمەي تۇر. قالا اكىمدىگى وسى جۇمىستاردى اتقارۋعا تەندەرگە جاريالاپ, كومپانيا­لاردى بەلگىلەگەنىمەن, قار ۋاقىتىندا تاسىلمايدى. ەگەر ەرتەڭ كۇن كۇرت جىلىپ كەتسە, تاۋ بولىپ ۇيىلگەن قاردىڭ سۋى ۇي­لەرگە كىرىپ كەتپەي مە دەگەن الاڭداۋ­شىلىق بار. وبلىس اكىمى بۇل سۇراق­تىڭ وتە وزەكتى ەكەنىن مويىنداپ, كەزدەسۋگە وزىمەن بىرگە كەلگەن قالا اكىمى سەرىك مۇحامەديەۆكە جولدادى. بىراق سوڭعىنىڭ جاۋابى تۇسىنىكسىز كۇيىندە قال­دى, ويتكەنى ونىڭ ءسوزى قار تاسيتىن كوم­پانيالاردى ەندى تاپتىق دەگەنگە سايادى.

جالپى, قالا باسشىسىنىڭ قار شى­عارۋ جۇمىستارىنا ءجۇردىم-باردىم قا­رايتىنى كورىنىپ ءجۇر. شا­ھاردا تەك جاياۋ جۇرگىنشىلەرگە ارنالعان «قازاقستان كونستي­تۋ­تسياسى» كوشەسى بيىل دۇ­رىس تازالانباعاندىقتان كوك مۇز بولىپ, جاياۋ­لاردى كىبىرتىكتەتىپ تاستاعان.

سونىمەن بىرگە وبلىستىڭ مادەنيەت وشاقتارىندا, اسىرەسە س.مۇقانوۆ اتىن­داعى وبلىستىق عىلىمي امبەباپ, ع.مۇسىرەپوۆ اتىن­داعى بالالار جانە جاسوس­پىرىمدەر, ي.شۋحوۆ اتىنداعى قا­لالىق كىتاپحانالاردا زيالى قاۋىم وكىلدەرى, وقىتۋشىلار مەن مۇعالىمدەر, كۋرسانتتار, ستۋدەنتتەر مەن وقۋشىلار قاتىسۋىمەن وتكىزىلەتىن مادەني ءىس-شا­رالارعا جەرگىلىكتى بيلىك وكىلدەرىنىڭ, ىشكى ساياسات, مادەنيەت باسقارمالارىنىڭ وكىلدەرى مۇلدە قاتىسپايتىنىن ايت­تىق. سوندىقتان حالىقتىڭ ايتقان ۇسىنىس-پىكىرلەرى جەرگىلىكتى بيلىكتىڭ قۇلاعىنا جەتپەيدى, مۇنداي ءىس-شاراعا قاتىسۋشىلار ۇنەمى نارازىلىق ءبىلدىرىپ جاتاتىنىن جەتكىزدىك. ع.نۇرمۇحامبەتوۆ بۇل ماسەلەنى مۇلدە بىلمەيتىنىن جا­سىرعان جوق. كەزدەسۋگە قاتىسىپ وتىرعان اكىمدىكتىڭ اپپارات جەتەك­شىسى رۋسلان الىشەۆكە تاپسىرما بەرىپ, وتكى­زى­لەتىن بارلىق ءىس-شاراعا بيلىك وكىل­دە­رىنىڭ قاتىسۋىن قام­تاماسىز ەتۋدى تاپسىردى.

ءبىز كوتەرگەن ءۇشىنشى ماسەلە – ءتىل باسقارماسىن قايتا اشۋعا ارنالدى. ەلدىڭ شەتىندەگى, جەلدىڭ وتىندەگى ايماقتا ونى جاۋىپ تاس­تاۋ, مەملەكەتتىك ءتىلدىڭ ءورىسىن تا­رىلتۋمەن بارابار. اۋىل شا­رۋاشىلىعى ءمينيسترى­نىڭ قىزمەتىنە اۋىسىپ كەتكەن بۇرىنعى اكىم ايداربەك ساپا­روۆ بۇل ماسەلەنى تۇزەتپەك بول­عان ەدى, الايدا ۇلگەرە الماي كەتتى. قازىرگى اكىم بۇل ماسە­لەنىڭ وڭ شەشىلەتىنىنە ۋادە بەردى.

«قازاقستان ءداۋىرى» گازەتىنىڭ وبلىس­تاعى مەنشىكتى ءتىلشىسى نۇرسايىن ءشارىپ ونوماستيكالىق ماسەلەلەردىڭ وڭالماي تۇرعانىن ايتا كەلىپ, تىم بولماسا ابى­لايدىڭ اتىنا دا پەتروپاۆل قالا­سىندا ءبىر كوشە ءالى كۇنگە بەرىلمەي تۇرعانىنا قىنجىلىس ءبىلدىردى. اكىم بۇل ماسەلەلەرگە دە ءوزىنىڭ وڭ قارايتىنىن, الداعى ۋاقىتتا قولعا الىناتىنىن مالىمدەدى.

جۋرناليستەردىڭ ءبارى دە وزەكتى ما­سەلەلەردى قوزعادى. مەكتەپ اۋلالا­رىنىڭ جون­دەلۋى, جاڭا سپورتتىق الاڭ­دار­دىڭ ءتۇزىلۋى, قالانىڭ كورىك­تەندىرىلۋى, اۋرۋحانالاردىڭ نازاردان تىس قالىپ كەلە جاتقانى جانە باسقا دا ما­سەلەلەر ور­تاعا سالىندى. سونىڭ ىشىندە وب­لىستىڭ مۋنيتسيپالدى تەلەارناسىنىڭ ديرەكتورى ەۆگەني سازونوۆ قالانىڭ كەيبىر كوشەلەرىندە تروتۋارلاردىڭ جوق ەكەنىنە نازار اۋداردى. ءبىز دە وسىدان بىرنەشە جىل بۇرىن قالاداعى ەڭ كورىكتى كوشەلەردىڭ ءبىرى – م.جۇ­ما­باەۆ داڭعىلىنىڭ جولىن جوندەگەندە, جۇمىسشىلاردىڭ جاياۋ سوقپاق جاساۋدى قالاي «ۇمى­تىپ» كەتكەنىنە قايران قالىپ, جازعانبىز. ءتىپتى ونىڭ جوسپارعا ەنگىزىلمەۋى مۇمكىن ەمەستىگىن, الايدا بولىنگەن قاراجات بىرەۋلەردىڭ قالتاسىنا ءتۇسىپ كەتۋى مۇمكىن ەكەنىن دە ايتقانبىز. وبلىس اكىمى بۇل ماسەلەنى ساتىلاپ جوندەۋ تۋرالى قالا اكىمىنە تاپسىردى.

ءسويتىپ, باق وكىلدەرى وبلىس اكى­مىنە كۇردەلى ماسەلەلەرگە قاتىستى سۇ­راقتارىن قويىپ, جەڭىلدەپ قالدى. ال ع.نۇر­مۇحامبەتوۆ وسى ۋاقىتقا دەيىن كوڭىل بولمەي كەلگەن ءبىرشاما دۇنيەنى ءبىلىپ, كوپتەگەن اقپارات الىپ, ەكى جاق تا ولجالى بولدى.

سولتۇستىك قازاقستان وبلىسى