پاۆلودار قالاسىندا بولعان وقيعاعا قاتىسى بار جوعارى شەندى پوليتسەي جاۋاپكەرشىلىككە تارتىلدى, دەپ حابارلايدى Egemen.kz Pavlodarnews.kz سايتىنا سىلتەمە جاساپ.
بىلتىر پاۆلودار پوليتسياسىنىڭ سولتۇستىك ءبولىمى باستىعىنىڭ ورىنباسارى قول استىنداعى اياعى اۋىر قىزمەتكەرىن ۇرعانى ءۇشىن ايىپتالعان ەدى. سونداي-اق بۇل جاعداي قر ىشكى ىستەر مينيسترلىگىنىڭ ىشكى قاۋىپسىزدىك دەپارتامەنتىنىڭ قىزمەت سالاسىنىڭ باقىلاۋىندا بولعان.
«2024 جىلدىڭ 25 قاڭتارداعى بۇيرىققا سايكەس ورتالىق پوليتسيا ءبولىمى باستىعىنىڭ تەرگەۋ جونىندەگى ورىنباسارى تەرىس سەبەپتەرمەن قازاقستان رەسپۋبليكاسىنىڭ ىشكى ىستەر ورگاندارىنان بوساتىلدى», دەپ جاۋاپ بەردى وبلىستىق پوليتسيا دەپارتامەنتى.
ەسكە سالا كەتەيىك, وتكەن جىلدىڭ 13 قازانىندا پاۆلودار قالاسىنىڭ پب سولتۇستىك پوليتسيا ءبولىمىنىڭ تەرگەۋشىسىنەن اتالعان ءبولىم باستىعىنىڭ ورىنباسارىنا شارا قولدانۋ تۋرالى ءوتىنىشى كەلىپ ءتۇستى. وبلىستىق پوليتسيا دەپارتامەنتىنىڭ باسشىسى ۆاسيلي سكلياردىڭ تاپسىرماسى بويىنشا قىزمەتتىك تەرگەۋ باستالعان ەدى. ونىڭ ناتيجەلەرى بويىنشا پوليتسيا قىزمەتكەرىنىڭ ارەكەتتەرىنە قۇقىقتىق باعا بەرىلەدى.