تۇركىستان ولىسى سوزاق اۋىلىنىڭ جاستارى ورتادان اقشا جيناپ, اۋىلدىق مەشىتتىڭ يمامى سۇلتانحان رۇستەموۆكە جاڭا كولىك پەن كىشى قاجىلىققا جولداما الىپ بەردى, دەپ حابارلايدى Egemen.kz.
جيىندا اۋىل اكىمى, اۋداندىق ءماسليحات دەپۋتاتتارى يمامدارىنا قولداۋ كورسەتكەن تۇرعىندارعا ريزاشىلىعىن ءبىلدىردى.
سۇلتانحان رۇستەموۆ 2003 جىلدان بەرى ءدىن سالاسىندا جۇمىس ىستەپ كەلەدى. اۋىلداعى شايحى احمەت مەشىتىندە يمام بولىپ قىزمەت اتقارعان. ال جاڭادان سالىنعان سوزاق اۋىلدىق مەشىتىنە يمام بولىپ بىلتىر تاعايىندالدى.
ايتا كەتسەك, سوزاقتىق جاستار بۇعان دەيىن ورتادان اقشا جيناپ, اۋىل كوشەلەرىنە جارىقتاندىرۋ باعاندارىن ورناتقان بولاتىن. سونداي-اق مەكتەپ بىتىرگەندەرىنە 20 جىل تولعان تۇلەكتەر جىل سايىن الەۋمەتتىك جاعدايى تومەن وتباسىنا ءۇي سالىپ بەرەدى.