تانىمال اقىن, اباي اتىنداعى مەملەكەتتىك سىيلىقتىڭ يەگەرى سەرىك اقسۇڭقار ۇلىنىڭ نەمەرەسى حاليفات راۋان ۇلى اقسۇڭقار جەكپە-جەكتىڭ گرەپپلينگ (رينگتەگى كۇرەس) تۇرىنەن ازيا چەمپيونى اتاندى, دەپ حابارلايدى Egemen.kz.
بايراقتى باسەكە اقتوبە قالاسىنىڭ «جەكپە-جەك سارايى» سپورت كەشەنىندە ءوتىپ جاتىر.
ەرتەڭ قورىتىندىلاناتىن قۇرلىق باسەكەسىندە حاليفات اقسۇڭقار 66 كگ سالماق دارەجەسىندە قارسىلاس شاق كەلتىرمەي, جەڭىس تۇعىرىنان كورىندى.
سپورتشىنىڭ باپكەرى – ايبار ورازالى. سونىمەن قاتار, ونىڭ رينگتەگى تەحنيكاسىنا قىزىققان برازيليالىق قوس باپكەر كارلوس فارياس پەن لۋكاس سيلۆا حاليفاتتى بىرلەسە جاتتىقتىرعان.
جەكپە-جەكتىڭ «كىلەمدەگى شاحمات» اتالاتىن بۇل ءتۇرى – سامبو, دزيۋدو, ەركىن كۇرەس جانە دجيۋ-دجيتسۋ ەرەجەلەرىنىڭ نەگىزىندە جاسالعان ارالاس باسەكە. ياعني, وتە كۇردەلى جەكپە-جەك. قالاي بولعاندا دا, كوپكە تاڭسىق جەكپە-جەك ونەرىنىڭ قىر-سىرىن, ءادىس-ءتاسىلىن جەتىك مەڭگەرگەن حاليفات اقسۇڭقار قازاق حالقىنىڭ جاۋىنگەرلىك ونەردىڭ جاۋجۇرەگى ەكەنىن ازيا قۇرلىعىنا مويىنداتتى. گرەپپلينگ تانىمال سپورت ءتۇرى سانالاتىن ەلدەردىڭ سايىپقىراندارىن سان سوقتىردى.