وزبەكستاندا تۋىپ-وسكەن تانىمال بوكسشى امان قونىسبەكوۆ اتاجۇرتقا قونىس اۋدارىپ, الداعى ءدۇبىرلى دودالاردا ءوزىنىڭ تاريحي وتانىنىڭ نامىسىن قورعاۋعا بەل بۋدى.
ناۋاي وبلىسىنىڭ زافاراباد اۋىلىندا دۇنيەگە كەلگەن 19 جاستاعى قانداسىمىزدىڭ ەلىشىلىك جانە حالىقارالىق جارىستاردىڭ جەڭىمپازى جانە جۇلدەگەرى دەگەن اتاعى بار. بىلتىر قاراشا ايىندا ۇيىمداستىرىلعان وزبەكستان بىرىنشىلىگىندە 71 كگ سالماق دارەجەسىندە سىنعا تۇسكەن قونىسبەكوۆ قولا مەدالدى موينىنا ءىلدى.
امان استاناعا كوشىپ كەلگەنىمەن رەسپۋبليكالىق دەڭگەيدەگى جارىستاردا تۇركىستان وبلىسىنىڭ اتىنان سىنعا تۇسەدى. بۇگىندە ول ەلدىڭ ۇلتتىق قۇراماسىمەن بىرگە الاتاۋ باۋرايىندا وقۋ-جاتتىعۋ جيىنىن وتكىزىپ جاتىر.