اۋىلعا بارساڭ, دالادا قالمايسىڭ...

اقجايىق وڭىرىنە دارىگەر ماماندار جەتىسپەيتىنىن بۇرىن دا تالاي جازعان ەدىك. بىلتىر ءوڭىر باسشىسى ناريمان تورەعاليەۆتىڭ قولداۋىمەن قازتالوۆ اۋدانىنا كەلگەن 6 مامان قىزمەتتىك تۇرعىن ۇيمەن قامتاماسىز ەتىلدى. بۇل ۇيلەر زاماناۋي ۇلگىدە, قۇ­رى­لىسى ساپالى, ءارى جارتىلاي جيھازبەن قامتىلعان. ءار ءۇي­دىڭ جەكە جىلىتۋ, كارىز جۇيەسى بار. جاڭا ۇيلەردىڭ كىلتىن جاڭا قوجايىندارىنا سالتاناتتى تۇر­دە تابىس ەتۋ ءۇشىن قازتالوۆ اۋدا­نى­نىڭ اكىمى اسلانبەك سارقۇلوۆ, اۋداندىق ءماسليحات توراعاسى سارسەنباي مولداشەۆ, اۋداندىق №1 اۋرۋحانانىڭ باس دارىگەرى رۋسلان احمەتجانوۆ جانە اۋىل تۇرعىندارى جينالىپ, كىشىگىرىم توي بولىپ قالدى.

– بىلتىر قازتالوۆ اۋدا­نىنداعى دەنساۋلىق ساقتاۋ سالا­سىندا ءبىراز جەتىستىك بولدى, اۋقىمدى جوبالار جۇزەگە استى. اتاپ ايتار بولساق, قاراوبا دارى­گەر­لىك امبۋلاتورياسى كۇردەلى جون­­دەۋدەن وتسە, قاراوزەن مەن بوستاندىق اۋىلدارىندا مەدي­تسي­نا­لىق نىساندار جاڭادان سالىنىپ, ەل يگىلىگىنە بەرىلدى. مۇنىمەن قوسا اۋدانىمىزعا 8 جەدەل جاردەم اۆتوكولىگى بەرىلدى. 761 ملن تەڭگە قاراجاتقا 51 ءتۇرلى مەديتسينالىق قۇرال-جابدىق ساتىپ الدىق, – دەپ اسلانبەك احمەتوللا ۇلى اۋداندا بولعان جاڭالىقتاردى اتاپ ءوتتى.

وڭىردە حالىق دەنساۋلىعىن ساقتاۋ سالاسىندا وڭ وزگەرىس كوپ, ناقتى جوسپار جاسالعان. سونىڭ ءبىرى – قازتالوۆ اۋداندىق اۋرۋحاناسى عيماراتىنا 2024-2025 جىلدارى جاپسارلاس قۇرىلىس جۇرگىزىپ, كوپبەيىندى ورتالىق اۋرۋحاناعا اينالدىرۋ ماسەلەسى. مەكەمە اۋدانارالىق اۋرۋحانا مارتەبەسىنە وتكەندە قوسىمشا شتاتتار ەنگىزىلىپ, 36 دارىگەر, 56 ورتا بۋىن مەديتسينالىق قىز­مەتكەر قاجەت بولادى ەكەن. سوندىقتان ەلگە كەلەتىن جاس مامان دارىگەر دە, ولارعا ارنايى سالىناتىن تۇرعىن ءۇي دە از بولماسا كەرەك.

باسپانالى دارىگەرلەر قاتا­رىن­دا تۇركىستان وبلىسىنان كەلگەن جاس مامان, بالالار دارىگەرى ادىلبەك قال­دى­بەكوۆ تە بار. جاس مامان جاڭا ۇيىنە باس سۇققان اۋدان باسشىسىنا العىسىن ايتىپ, الداعى ۋاقىتتا اۋدان حالقىنىڭ دەنساۋلىعىن جاقسارتۋعا ايانباي ەڭبەك ەتەتىنىن جەتكىزدى.

– بىلتىر تامىز ايىندا مارات وسپانوۆ اتىنداعى اقتوبە مەديتسينا اكادەمياسىن جالپى تاجىري­بە­لىك دارىگەر ماماندىعى بويىنشا ءبىتىرىپ, قولىما ديپلوم الىپ ەدىم. كۇيەۋىم – كاسىپكەر. جاس مامان, جاس وتباسى بولىپ, قىركۇيەك ايىندا قازتالوۆقا كەلىپ ەدىك. بۇگىن, مىنە, جارتى جىلعا جەتپەي 3 بولمەلى جايلى پاتەرگە يە بولىپ جاتىرمىز. كوپ-كوپ راحمەت! – دەيدى ءمولدىر بەكباتىرقىزى.

ءمولدىردىڭ ارىپتەسى دينا قاجەتقىزى قازىرگى اباي وبلى­سىن­­دا­عى كوكپەكتى وڭىرىندە تۋىپ-وسكەن ەكەن. 2023 جىلى سە­مەي مەديتسينا ۋنيۆەرسيتەتىن تامام­دا­عان.

«وتكەن جىلى 4 قىركۇيەكتە قازتالوۆ توپىراعىنا تابانىم العاش ءتيىپ ەدى. سوناۋ شىعىس قازاقستاننان ەلىمىزدىڭ باتىس قيىرىنا كەلگەندە الاڭداعانىم راس. بىراق بۇل جاقتىڭ ادامدارى دا, اۋا رايى دا جاقسى ەكەن. ۇيرەنىپ كەتتىم. جۇمىسىم ۇنايدى. اۋدان ورتالىعىن, اپتا سالىپ قوشانكول, تەرەڭكول اۋىل­دارىن ارالاپ, حا­لىق­تىڭ دەن­ساۋلىعىن تەكسەرىپ تۇرامىز. ءدال قازىر تۇماۋ, جەلشەشەك دەگەن اۋرۋلار كوبەيىڭكىرەپ تۇر, بىراق بۇل قالىپتى جاعداي عوي. جاڭا قونىسىمىز دا كەرەمەت, ۇناپ جاتىر», دەيدى جالپى تاجىريبەلىك دارىگەر دينا قاجەتقىزى.

باتىس قازاقستان وبلىسى