تاياۋدا قازاقستان بوكس فەدەراتسياسىنىڭ (قبف) پرەزيدەنتى كەڭەس راقىشەۆ قىزمەتىنەن كەتىپ, ونىڭ ورنىنا شاحمۇرات ءمۇتالىپ كەلدى. قازىرگى كەزدە اتالعان ۇيىمدا ءبىراز اۋىس-تۇيىستەر بولىپ جاتىر. وتكەن اپتادا اتاقتى بوكسشى مۇحتارحان دىلدابەكوۆ قبف-نىڭ باپكەرلەر شتابىمەن جۇمىس جونىندەگى ۆيتسە-پرەزيدەنتى بولىپ تاعايىندالدى. اسا اۋىر سالماقتا ايقاسقان 47 جاستاعى الاشتىڭ ماقتان تۇتار ازاماتى كەزىندە سيدنەي وليمپياداسى مەن الەم چەمپيوناتىنىڭ كۇمىس جۇلدەگەرى, ازيا ويىندارىنىڭ جەڭىمپازى جانە ەكى دۇركىن ءفيناليسى, الەم كۋبوگىنىڭ جۇلدەگەرى اتانعانىن جۇرت جاقسى بىلەدى. بىلعارى قولعابىن شەگەگە ىلسە دە مۇحتارحان وسى سالادان الىستاپ كەتكەن جوق. قازىرگى كەزدە ول – شىمكەنتتەگى سپورت مەكتەپتەرىنىڭ ءبىرىنىڭ ديرەكتورى.
تۇركيانىڭ انتاليا قالاسىندا تاەكۆوندودان G1 ساناتىنداعى «Turkish Open» حالىقارالىق ءتۋرنيرى ءوتتى. جەر جاھاننىڭ 60 مەملەكەتىنەن كەلگەن 1 900 سپورتشى ونەرىن ورتاعا سالعان جارىستا قازاقستاننىڭ دايان شەبەرلەرى ءۇش جۇلدەگە قول جەتكىزدى: جانسەل دەنيز بەن ساميرحون ابۋباكىروۆ (73 كگ) كۇمىسپەن كۇپتەلسە, رۋسلان جاپاروۆ (+87 كگ) قولاعا قول سوزدى.
2026 جىلى يتاليانىڭ ميلان مەن كورتينا د’امپەتستسو قالالارىندا الاۋى تۇتاناتىن XXV قىسقى وليمپيا ويىندارىنىڭ ىرىكتەۋ سايىسىندا قازاقستاننىڭ حوككەيشىلەرى قاي كوماندالارمەن كۇش سىناساتىنى بەلگىلى بولدى. جەرلەستەرىمىز D توبىنا ءتۇستى. قارسىلاستارىمىز – سلوۆاكيا, اۋستريا جانە ماجارستان. بۇل باسەكەلەر 29 تامىز بەن 1 قىركۇيەك ارالىعىندا براتيسلاۆادا وتەدى. ىرىكتەۋ تۋرنيرىندە بارلىعى 12 مەملەكەتتىڭ وكىلدەرى شەبەرلىك بايقاسادى.
حالىقارالىق فۋتبول فەدەراتسياسىنىڭ (فيفا) جاڭارتىلعان رەيتينگىندە قازاقستان قۇراماسى ءوزىنىڭ 100-ورنىن ساقتاپ قالدى. بۇرىنعى كسرو-نىڭ قۇرامىندا بولعان مەملەكەتتەر اراسىندا ۋكراينا (22), رەسەي (38), وزبەكستان (68), بەلارۋس (95) جانە تاجىكستان (99) بىزدەن وزىپ تۇر. ال توپ-10 كوماندانىڭ قاتارىنا مىنا كوماندالار ەندى: ارگەنتينا, فرانتسيا, انگليا, بەلگيا, برازيليا, نيدەرلاند, پورتۋگاليا, يسپانيا, يتاليا جانە حورۆاتيا.
كاسىپقوي رينگتە كۇش سىناسىپ جۇرگەن قازاقستاننىڭ بوكسشىسى انگەلينا لۋكاس ءوزىنىڭ كەلەسى جەكپە-جەگىن 29 اقپاندا تايلاندتىڭ استاناسى بانگكوكتا وتكىزەدى. ول كادەسارا دجادپاكدەمەن جۇدىرىقتاسادى. جەرگىلىكتى بىلعارى قولعاپ شەبەرىنىڭ رەكوردى – 10 كەزدەسۋ, 7 جەڭىس, 3 جەڭىلىس. جەرلەسىمىز التى باسەكەنىڭ تەك بىرەۋىندە عانا ۇتىلدى.