قازاقستان رەسپۋبليكاسى ورتالىق مەملەكەتتىك ءارحيۆىنىڭ ۇيىمداستىرۋىمەن ۇلت-ازاتتىق كۇرەستىڭ سيمۆولىنا اينالعان كەنەسارى قاسىم ۇلىنىڭ ءىسىن جالعاستىرۋشى جانە ونىڭ تىكەلەي ۇرپاعى جاپار سۇلتاننىڭ ءومىرى مەن ءىس-ارەكەتىنە قاتىستى جيناقتالعان «جاپار سۇلتان: قۇجاتتار مەن ماتەريالدار» اتتى دەرەكتەردىڭ تانىستىرىلىمى ءوتتى.
ماڭىزدى جيىنعا تاريح عىلىمدارىنىڭ دوكتورى, اكادەميك ح.ءابجانوۆ, ش.ءۋاليحانوۆ اتىنداعى تاريح جانە ەتنولوگيا ينستيتۋتى ديرەكتورىنىڭ عىلىمي ىستەر جونىندەگى ورىنباسارى ش.تىلەۋباەۆ جانە سۇلتاننىڭ ۇرپاقتارى ءھام ارحيۆ, كىتاپحانا قىزمەتكەرلەرى قاتىسىپ, عالىمدار تۋىندى تۋرالى ويلارىمەن ءبولىستى.
جيناققا قازاقستان رەسپۋبليكاسى ورتالىق مەملەكەتتىك ءارحيۆى, رەسەي مەملەكەتتىك اسكەري-تاريحي ءارحيۆى, ورىنبور وبلىستىق مەملەكەتتىك ءارحيۆى, وزبەكستان رەسپۋبليكاسىنىڭ ۇلتتىق ءارحيۆى قورلارىندا ساقتالعان ءھام وسى ۋاقىتقا دەيىن عىلىمي اينالىمعا ەنگىزىلمەگەن تىڭ قۇجاتتار, سونىمەن قاتار شەجىرەشى ءماشھۇر-ءجۇسىپ كوپەي ۇلىنىڭ قولجازبا قورىندا ساقتالعان دەرەكتەر, «بەكەت باتىر» جىرىندا ايتىلاتىن جاپار سۇلتاننىڭ بەكەت باتىرمەن بىرگە بەرەزوۆ تۇرمەسىنەن قاشىپ شىققانى تۋرالى دا مالىمەتتەر ەنگىزىلىپتى.