بۇعان دەيىن دە ءبىز قازاقستان فۋتبول فەدەراتسياسى (قفف) جاڭا ماۋسىم قارساڭىندا وتاندىق كلۋبتار اراسىندا تۋرنير ۇيىمداستىرىلعالى جاتقانى جونىندە جازعانبىز.
جۇلدە قورى 100 ملن تەڭگەنى قۇرايتىن سول دوپ دوداسى باستالىپ تا كەتتى. تۇركيانىڭ بيلەك قالاسىنداعى «تيتانيك دەليۋكس» ستاديونىندا ەل چەمپيونى «ورداباسى» مەن ءبىرىنشى ليگانىڭ جەڭىمپازى «ەلىماي» كەزدەستى. وسى ويىندا شىمكەنتتىكتەر سەمەيلىكتەردىڭ قاقپاسىنا جاۋاپسىز ءتورت دوپ سوقتى – 4:0. بۇل گولداردىڭ اۆتورلارى – سەرگەي مالىي, اسحات تاعىبەرگەن, ۆلاديسلاۆ ۆاسيلەۆ جانە ۆسەۆولود سادوۆسكي. كوپ كەشىكپەي پرەمەر-ليگانىڭ قولا جۇلدەگەرى «اقتوبە» مەن قازاقستان كۋبوگىنىڭ يەگەرى «توبىل» جاسىل الاڭعا شىقتى. باسەكە بارىسىندا احمەد ءال-مەسساۋدي مەن يسلام چەسنوكوۆ قوستانايلىقتاردى ەكى مارتە العا شىعارعانىمەن, كوپ ۇزاماي اقتوبەلىكتەردىڭ ساپىنداعى قوس لەگيونەر – رەسەيلىك شابۋىلشى ىدىرىس ۋماەۆ پەن نيگەريالىق قورعاۋشى ۋچە انري اگبو تارازى باسىن تەڭىستىردى. ودان كەيىن «توبىل» قارقىنىن كۇرت كۇشەيتتى. سونىڭ ناتيجەسىندە سەربيالىق جارتىلاي قورعاۋشى يگور يۆانوۆيچ ءۇشىنشى دوپتى قاقپاعا توعىتسا, كەزىندە ماروككو قۇراماسىنىڭ ساپىندا ويناعان ءال-مەسساۋدي كەزدەسۋدىڭ سوڭعى نۇكتەسىن قويدى – 4:2.
«ورداباسى» مەن «توبىل» اراسىنداعى فينالدىق سايىس 21 اقپاندا استانا ۋاقىتى بويىنشا 20:30-دە وتەدى. وسى تۋرنيردە باس جۇلدە العان كوماندا 60 ملن-دى ولجالاسا, ەكىنشى ورىندى يەلەنگەن ۇجىم 40 ملن-دى ەنشىلەيدى.