كوكشەتاۋدا سۋ قۇبىرى جارىلىپ, 20-عا جۋىق ءۇي سۋدان اجىراتىلدى. قازىرگى كەزدە قالپىنا كەلتىرۋ جۇمىسى جۇرگىزىلىپ جاتىر, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
قالالىق اكىمدىكتەن ءمالىم ەتكەندەي, اپات اقان سەرى, 172 مەكەنجايىندا ورنالاسقان «تابىس» دۇكەنى اۋماعىندا بولعان. الدىن الا انىقتالعانداي, توزىعى جەتكەن شويىن قۇبىرى جارىلعان. اپات ورنىندا قالا اكىمى باۋىرجان عايسا ءجۇر.
«اپاتتىڭ سالدارىنان سۋ قۇبىرى جەلىسى بويىنداعى اقان سەرى-ەلەمەسوۆ كوشەسى د-300 مم, اقان سەرى-عابدۋللين د-200, اقان سەرى-پۋشكين د-50 مم قاقپا كلاپاندارى جابىلىپ, اقان سەرى كوشەسىنىڭ ەلەمەسوۆ كوشەسىنەن پۋشكين كوشەسى ارالىعىندا ورنالاسقان 20-عا جۋىق كوپپاتەرلى تۇرعىن ءۇي سۋدان اجىراتىلدى. اپات ورنىندا «كوكشەتاۋ سۋ ارناسى» كوممۋنالدىق كاسىپورنىنىڭ ماماندارى قالپىنا كەلتىرۋ جۇمىستارىن جۇرگىزىپ جاتىر. جوندەۋ جۇمىستارىنا بارلىعى 5 ادام مەن 5 تەحنيكا جۇمىلدىرىلعان», دەپ ءتۇسىندىردى قالالىق اكىمدىكتەن.