جىل باسىنان بەرى قىزمەتتىك يتتەردىڭ كومەگىمەن 575 قىلمىس, ونىڭ ىشىندە 190 ۇرلىق, 16 توناۋ, 2 قاراقشىلىق, 7 كىسى ءولتىرۋ جانە 129 ەسىرتكى قىلمىسى اشىلدى. سونىمەن قاتار زاڭسىز اينالىمنان شامامەن 130 كگ ەسىرتكى تاركىلەندى, دەپ جازادى Egemen.kz Polisia.kz-كە سىلتەمە جاساپ.
«ىشكى ىستەر ورگاندارىندا قىزمەتتىك-ىزدەستىرۋ يتتەرى ءىز كەسۋ, پاترۋلدىك, ەسىرتكى جانە جارىلعىش زاتتاردى ىزدەۋ باعىتتارى بويىنشا قىزمەت اتقارادى. ءتورت اياقتى كومەكشىلەر قىلمىستاردى اشۋدا كەڭىنەن قولدانىلادى. جاقىندا عانا اقتوبە وبلىسىندا اۆتوكولىكتى تەكسەرۋ كەزىندە قىزمەتتىك-ىزدەستىرۋ يتىمەن شامامەن 60 كگ ەسىرتكى تابىلىپ, تاركىلەندى. ولار قىلمىسكەرلەر مەن جوعالعان ادامداردى, بالالاردى تابۋعا كومەكتەسەدى», دەلىنگەن حابارلامادا.
ماسەلەن, 16 قاڭتاردا قاراعاندىدا ءۇشىنشى سىنىپ وقۋشىسى جوعالدى, وزىمەن بىرگە ۇيالى تەلەفونى بولماعان. الايدا يت ءدال سول كۇنى ءيىس ىزدەرى ارقىلى بالانى تاۋىپ الدى.
«ەسىرتكى كونترابانداسىنىڭ فاكتىلەرىن بولدىرماۋ ماقساتىندا مەموراندۋم شەڭبەرىندە تۇراقتى نەگىزدە «قازپوشتا» فيليالدارىندا پوشتا جونەلتىمدەرى تەكسەرىلەدى. بۇعان قوسا, كينولوگ ماماندارمەن اۋەجاي مەن ۆوكزالدارعا, پويىزدارعا تەكسەرىستەر جۇرگىزىلەدى», دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى كينولوگيالىق قىزمەت ءبولىمىنىڭ باستىعى الماس كۇنتۋوۆ.