فۋتبولدان ۋەفا چەمپيوندار ليگاسىنىڭ تاعى ەكى ويىنى ءوتتى. بۇل جولى ءريمنىڭ «لاتسيوسى» ميۋنحەننىڭ «باۆارياسىن» جانە ءپاريجدىڭ پسج-سى سان-سەباستياننىڭ «رەال سوسەدادىن» قابىلدادى.
كونە قالانىڭ وليمپيادالىق ستاديونىندا سەنساتسيالىق ناتيجە تىركەلدى. ەۋروكۋبوك جولىنداعى جارىستاردا ۇزاق جىلدار بويى «باۆاريانىڭ» وسال تۇسىن تابا الماي جۇرگەن «لاتسيو» بۇل جولى كوزدەگەن ماقساتىنا قول جەتكىزدى. باسەكە تاعدىرىن 69-مينۋتتا 11 مەترلىك نۇكتەدەن چيرو يمموبيلە سوققان جالعىز گول شەشتى – 1:0. سول تۇستا ميۋنحەندىكتەردىڭ قورعاۋشىسى دايو ۋپامەكانو دورەكى ويىنى ءۇشىن الاڭنان قۋىلدى. بىراق يتاليالىق كومانداعا قۋانۋعا ءالى ەرتە. ويتكەنى 5 ناۋرىزدا نەمىس جەرىندە وتەتىن قارىمتا ماتچتا ولار كەتكەن ەسەنى قايتارۋ ءۇشىن بارىن سالادى.
پسج مەن «رەال سوسەدادتىڭ» ويىنىندا دا العاشقى تايمدا ەسەپ اشىلعان جوق. ال ۇزىلىستەن كەيىن الاڭ يەلەرى بىرنەشە اسا قاۋىپتى شابۋىلدار ۇيىمداستىرىپ, سونىڭ ەكەۋى ناتيجەلى اياقتالدى. 58-مينۋتتا كيليان مباپپە مەن 70-مينۋتتا برەدلي باركولا نىسانانى ءدال كوزدەدى. ەسەپ – 2:0.