ەلىمىزدەگى كيەلى جەرلەر شىراقشىلاردىڭ كۇن كورىس كوزىنە, باقسى-بالگەرلەردىڭ ورداسىنا اينالعان. سەناتور دارحان قىدىرالى ۇكىمەت باسشىسىنا جولداعان دەپۋتاتتىق ساۋالىندا وسى ماسەلەنى كوتەرىپ, رۋحاني ەسكەرتكىشتەردى قورعاۋعا ايرىقشا كوڭىل ءبولۋ قاجەت ەكەنىن ايتتى, دەپ حابارلايدى Egemen.kz.
«قازاقستانداعى 25 مىڭ ەسكەرتكىشتىڭ جارتىسىنا جۋىعى ورنالاسقان ماڭعىستاۋ وڭىرىندە مۇرالاردىڭ كوبى تاريحي-مادەني ەسكەرتكىشتەر تىزىمىنە ەنگىزىلگەنىمەن, ولاردى قاراۋعا مامان جەتىسپەيدى. مادەني قاباتتاردى «قارا ارحەولوگتار» مەن بۇزاقىلار ءتۇرلى ۆانداليزم ارقىلى ءبۇلدىرىپ جاتىر. جەتى جۇرت كوشكەن ماڭعاز مەكەندەگى قورىمداردىڭ قورشاۋ اۋماعىنا زاڭسىز قۇرىلىستار, بەيىتتەر سالىنىپ كەتكەن. ولارعا قارسى قولدانىستاعى «تاريحي مادەني مۇرانى قورعاۋ جانە پايدالانۋ» زاڭى قاۋقارسىز. ايىپپ ۇلى نەبارى 30 مىڭ تەڭگە عانا! ۇلىتاۋدا جوشى كەسەنەسىنىڭ جانىنا الدەبىر قالتالى جاقىنىن جەرلەپ كەتكەن, ەندى نىساندى يۋنەسكو تىزىمىنە ەنگىزۋ مۇمكىن بولماي تۇر», دەدى د.قىدىرالى.
سەناتور كيەلى جەرلەر شىراقشىلاردىڭ كۇن كورىس كوزىنە, باقسى-بالگەرلەردىڭ ورداسىنا اينالعانىن ايتتى. ونىڭ سوزىنشە ولاردىڭ كەيبىرى تاريحي ورىندى ساقتاپ وتىرعانىمەن, ارنايى ءبىلىم, ەرەجە-قاعيداتتارى مەن ستاندارتى جوق.
ء«تىپتى ۇلتقا ۇران بولعان بەكەت اتا – جەكەنىڭ مەنشىگىندە! ءپىر بەكەت – ءبىر قازاقتىڭ ايبارى ەمەس, ول – بار قازاقتىڭ بايراعى! حالىقتىڭ رۋحاني قالپىن قالىپتاستىرعان مۇنداي تۇلعالار مەكەنى قۇندىلىق رەتىندە مەملەكەت قاراۋىندا بولۋى ءتيىس! سوندىقتان ەلىمىزدە رۋحاني ەسكەرتكىشتەردى قورعاۋعا ايرىقشا كوڭىل ءبولۋ قاجەت», دەدى دەپۋتات.