كەشە يوحاننەسبۋرگ قالاسىندا فۋتبولدان ءحىح الەم چەمپيوناتى جالاۋىن كوتەرسە, استانا ۋاقىتى بويىنشا كەشكى ساعات 20.00-دە تەڭبىل دوپ دوداسىنىڭ العاشقى كەزدەسۋى ءوتتى. جارىستىڭ شىمىلدىعىن ا توبىنا تۇسكەن وار مەن مەكسيكا قۇرامالارى اشتى.
جالپى, بيىلعى چەمپيوناتقا كوپشىلىك “جۇلدىزدارسىز جارىس” دەگەن باعا بەرسە دە, ونىڭ قىزىقتى دا تارتىمدى وتەتىنىنە جانكۇيەرلەردىڭ كوبى سەنىمدى.
بيىلعى چەمپيوناتتى “جۇلدىزدارسىز جارىس” بولاتىنىن جوعارىدا ايتتىق. دەگەنمەن, جارىسقا دەۆيد بەكحەم, ريو فەرديناند, ميحاەل باللاك, رونالدو مەن رونالدينيۋ جانە باسقا دا اياقدوپ شەبەرلەرى قاتىسپاسا دا مەسسي, روبينو, توررەس, ينەستا, دەكۋ, حاۆي, ت.ب. ءبىر-ەكى فۋتبولشىنىڭ جاسىنداي جارقىلدايتىنى ءسوزسىز.
ەندى ءسوز رەتى الەم رەكوردتارىنا كەلگەندە, مىنا مالىمەتتەردى تانىستىرا كەتسەك, ارتىق ەتپەس دەپ ويلايمىز. بۇگىندە برازيليا كوماندالار اراسىندا ەڭ كوپ الەم چەمپيونى اتانعان قۇراما اتانىپ وتىر. ول باس ءجۇلدەنى بەس رەت جەڭىپ الدى. بۇل ەلدىڭ قۇراماسىنا قاتىستى ايتاتىن تاعى ءبىر نارسە, برازيليا ساپىندا اتاقتى پەلە جالعىز ءوزى عانا ءۇش دۇركىن الەم چەمپيونى اتانعان. ەدسون ارانتەس دۋ ناسيمەنتۋ ءوزىنىڭ العاشقى دوبىن 1958 جىلى ۋەلس قۇراماسىنا 17 جاسىندا سوعىپتى. ال 5 كۇننەن كەيىن حەت-تريك جاساعان ەڭ جاس فۋتبولشى بولدى. تاعى 5 كۇن وتكەن سوڭ, ول فينالدا گول سوققان ەڭ جاس ويىنشى اتاندى. بۇل كەزدەسۋدە برازيليا شۆەتسيادان 5:2 ەسەبىمەن باسىم تۇسكەنى بەلگىلى. ال ونىڭ وتانداسى كافۋ مەرگەندىك شەبەرلىگىمەن ەمەس, كوماندا ساپىندا ەڭ كوپ جەڭىسكە جەتكەن فۋتبولشى بولدى. ول ءوزى وتكىزگەن ويىنداردىڭ ىشىندەگى 16 كەزدەسۋدە جەڭىسكە جەتتى. برازيليانىڭ ماريو زاگالو ەسىمدى مامانى فۋتبولشى جانە باپكەر رەتىندە ءۇش دۇركىن چەمپيون اتاندى. ونىڭ جەرلەسى لۋي فەليپپە سكولاري جاتتىقتىرعان برازيليا جانە پورتۋگاليا كوماندالارى 11 كەزدەسۋدى جەڭىسپەن اياقتادى.
گەرمانيانىڭ بۇرىنعى جارتىلاي قورعاۋشىسى لوتار ماتتەۋس الەم چەمپيوناتتارىندا ەڭ كوپ ويىن وتكىزگەن فۋتبولشى بولىپ وتىر. ول 25 كەزدەسۋ وتكىزگەن. ال ونىڭ وتانداسى حەلمۋت شەن باپكەر رەتىندە ۇلتتىق قۇرامانى 25 رەت الاڭعا الىپ شىققان. يتاليانىڭ قورعاۋشىسى پاولو مالديني الاڭدا ەڭ ۇزاق ۋاقىت وتكىزگەن فۋتبولشى اتانۋدا. ول جاسىل الاڭدا بارلىعى 2 217 مينوت بولدى. رەسەيلىك ولەگ سالەنكو ءبىر كەزدەسۋدە ەڭ كوپ دوپ سوققان فۋتبولشى رەتىندە تاريحتا قالدى. سالەنكو 1994 جىلى كامەرۋن قاقپاسىنا 5 دوپ سوقتى. دەگەنمەن كەزدەسۋ 6:1 ەسەبىمەن اياقتالعانىمەن, رەسەي 1/8 فينالعا شىعا المادى. الەم چەمپيوناتىندا ەڭ ناتيجەلى مۋنديال 1998 جىلى بولدى. سول كەزدە فرانتسيادا ءوتكەن جارىستا 171 دوپ سوعىلدى.
ال كەشەگى وتكەن العاشقى ويىنعا كەلسەك, ول اسا تارتىستى ءوتتى. كەزدەسۋدىڭ العاشقى بولىگىندە مەكسيكالىقتاردىڭ ازداعان اۋماقتىق باسىمدىعى بايقالعانىمەن, كەيىن كەلە الاڭ يەلەرى دە اۋىق-اۋىق ازۋ كورسەتۋمەن بولدى. ءسويتىپ ويىننىڭ ەكىنشى كەزەگىنىڭ 54-ءىنشى مينوتىندە ەسەپ اشىپ, العا شىققان ەدى. بىراق ءوڭتۇستىكافريكالىقتار جەڭىس دوبىن ۇستاپ تۇرا المادى. كەزدەسۋ اياقتالۋعا شامامەن 11 ءمينوت قالعاندا مەكسيكالىقتار ەسەپتى تەڭەستىرىپ كەتتى.
داستان كەنجالين.