پوليتسيا قىزمەتكەرلەرى المالى اۋدانىنداعى مەشىتتەردە تىركەلگەن ءتورت ۇرلىقتىڭ بەتىن اشىپ, كۇدىكتىنى قولعا ءتۇسىردى. الماتى وبلىسىنىڭ 40 جاستاعى تۇرعىنى زاڭسىز ارەكەتىن جۇزەگە اسىرۋ بارىسىندا بەينەباقىلاۋ كامەرالارىنا ءتۇسىپ قالعان, دەپ حابارلايدى Egemen.kz.
قالالىق پوليتسيا دەپارتامەنتىنىڭ ءباسپاسوز قىزمەتى ب. ەسىمدى ەر ادامنىڭ ۇرلىق جاساعان كەزدە بەينەباقىلاۋ كامەرالارىنا ءتۇسىپ قالعانىن, ناماز كەزىندە جەرگىلىكتى تۇرعىننىڭ جەكە مۇلكىن قولدى قىلعانىن حابارلادى. ناتيجەسىندە 200 مىڭ تەڭگە كولەمىندە ماتەريالدىق شىعىن كەلتىرگەن. انىقتالعانداي, ۇستالعان ەر ادامنىڭ وسىعان ۇقساس 4 ۇرلىققا قاتىسى بار.
المالى اۋداندىق پب-نا قاراستى پوليتسيا ءبولىمىنىڭ باستىعى باتۇرجان ءابدىماساروۆتىڭ ايتۋىنشا, اتالعان دەرەكتەر ءبىر وندىرىسكە بىرىكتىرىلىپ, سوتقا دەيىنگى تەرگەۋ امالدارى جۇرگىزىلىپ جاتىر. ۇستالعان ادام ءوز كىناسىن مويىندادى.
«وزگە اقپارات تەرگەۋ مۇددەسىنە وراي جاريا ەتىلمەيدى», دەلىنگەن حابارلامادا.