سەبەبى اقشا ينۆەستيتسيالىق كىرىس ەسەبىنەن اۋدارىلادى, دەپ حابارلايدى Egemen.kz.
ماسەلەن, بيىلعى كىرىستىڭ 50% – 695 ملن اقش دوللارىنا جۋىقتاعان. سوندىقتان باعدارلاماعا قاتىسۋشى 6 ملن 900 مىڭنان استام بالاعا 100 دوللار 52 تسەنت اۋدارىلعان. ونى بالالار كامەلەتكە تولعاندا تەك ءبىلىم الۋعا جانە تۇرعىن ۇيگە عانا قولدانا الادى. ال بيىل 18 جاسقا تولاتىن 300 مىڭنان استام بالاعا اقشا زەينەتاقى قورىنا تۇسەدى.
"حابار" اگەنتتىگىنە جاۋاپتىلاردىڭ ايتۋىنشا, بارلىق قازاقستاندىق بالالارعا اقشا اۋدارىلعان. بىراق ازاماتتىعى جوق نەمەسە دۇرىس كورسەتىلمەگەن بولسا, اتا-اناسى نەمەسە زاڭدى وكىلى كوشى-قون قىزمەتىنە جۇگىنۋى ءتيىس. جەكە باسىن كۋالاندىراتىن جسن جوق بولسا, تۇرعىلىقتى جەرى بويىنشا مەملەكەتتىك كورپوراتسياعا بارۋ كەرەك.
- 2024 جىلعى 1 قاڭتاردان باستاپ باعدارلامانىڭ قاتىسۋشىلارى رەتىندە 2006 جىلدىڭ ءبىرىنشى قاڭتارىنان باستاپ 2023 جىلدىڭ 31 جەلتوقسانىنان دەيىن تۋعان قازاقستان رەسپۋبليكاسىنىڭ ازاماتتارى بولىپ ەسەپتەلەتىن بالالار تىركەلدى. كەلەسى جىلدارى تۋعان بالالار دا اۆتوماتتى تۇردە باعدارلامانىڭ قاتىسۋشىسى بولادى. بىرىڭعاي جيناقتاۋشى زەينەتاقى قورى جىل سايىن مەملەكەتتىك دەرەكتەر قورىنان اقپارات الىپ, وسى بالالاردىڭ دەرەكتەرىن جۇرگىزىپ وتىرادى, - دەيدى «بجزق» اق باسقارۋشى ديرەكتورى مۇرات ءشارىپوۆ.