ەلەنا تاعى ەرلەدى

باستاپقى باسەكەلەردە ول امەريكالىق دانيەل كوللينز (WTA-نىڭ №71 راكەتكاسى) بەن يسپانيالىق كريستينوي بۋچادان (№74) باسىم ءتۇستى. العاشقى ويىندا وتانداسىمىز ءبىراز قينالسا, ەكىنشىسىندە قار­سىلاسىن وڭاي ەڭسەردى. جارتىلاي فينالدا رىباكينانىڭ جولى الەمدىك رەيتينگتە 15-ورىندا تۇرعان رەسەيلىك ليۋدميلا سام­سونوۆامەن قيىس­تى. العاشقى سەتتى ءبىزدىڭ سپورتشى تازا ۇتقانىمەن, ەكىنشىسىندە جەڭىلىس تاپتى. ەسەسىنە شەشۋشى تۇستا شيرەك قيمىل­داپ, فينالعا جولداما الدى – 6:0, 4:6, 6:2. ءبىر ايتا كەتەرلىگى, بۇعان دەيىن قوس تەننيسشى ءوزارا ءتورت مارتە كەزدەسىپ, بۇل باسەكەلەردىڭ بارلىعى سامسونوۆانىڭ پايداسىنا شەشىلگەن ەدى.

باس جۇلدە ءۇشىن ەلەنا الەمنىڭ 14-راكەتكاسى, رەسەيلىك داريا كاساتكينامەن كۇش سىناستى. 26 جاستاعى ءتولياتتيدىڭ تۋماسى WTA تۋرنيرلەرىندە التى رەت توپ جاردى. رولان گارروستىڭ جارتىلاي جانە ۋيمبلدوننىڭ شيرەك فينالىندا وينادى. قازىرگى كەزدە ول ۇزدىكتەر تىزىمىندە 14-ساتىعا جايعاستى. ءتۇرلى تۋرنيرلەردە ءتورت رەت شەبەرلىك باي­قاسقان تەننيسشىلەر اراسىنداعى ەسەپ ازىرگە تەڭ. بۇل جولى رىباكينا كورتتا ەركىن قيمىلداپ, قارسىلاسىنا ادىم اشتىرمادى. ناتيجەسىندە, 6:1, 6:4 ەسەبىمەن جەڭىسكە جەتكەن جەرلەسىمىز باس جۇلدەمەن قاتار 142 مىڭ دوللاردى قالتاسىنا باستى. بۇل – ەلەنانىڭ بيىلعى ماۋسىمداعى WTA تۋرنيرلەرىندەگى ەكىنشى جەڭىسى! قاڭتار ايىندا ول بريسبەندەگى باسەكەدە الدىنا جان سالماعان ەدى.

جارىس اياقتالعان بەتتە ءدۇيىم جۇرتتىڭ الدىندا ءسوز العان ەلەنا رىباكينا: ء«ابۋ-دابيدەگى جارىس بارىسىندا قازاقستاننىڭ تۋىن كورگەن سايىن ەرەكشە شاتتاندىم. جەرلەستەرىمنىڭ قولداۋىن سەزىنىپ, ءار كەزدەسۋ سايىن كورتقا قۇشتارلانىپ شىقتىم. ءاربىر ويىندا بارىمدى سالدىم. اركەز مەنىڭ تىلەۋىمدى تىلەپ وتىراتىن ءوزىمنىڭ شىنايى جانكۇيەرلەرىمدى قۋانتقىم كەلدى. پارسى شىعاناعىندا ول ماقساتىما جەتتىم. فينالدىق سايىستا اياقتالعان بەتتە ءار تۇستا جەلبىرەپ تۇرعان قازاقتىڭ كوك بايراعىن كوزىم شالدى. سوعان سۇيسىنە قارادىم. بۇل دا مەنىڭ سپورتتىق عۇمىرىمداعى قۋانىشتى, اسەرلى ساتتەردىڭ ءبىرى», دەپ اعىنان جارىلدى.

جاسى كەلگەن سايىن بابى كەمي باستاعان ميحايل كۋكۋشكين نوت­تين­گەمدەگى «چەل­لەندجەر» ءتۋرنيرىنىڭ فينالىنا شىعا المادى. جۇلدە قورى نەبارى 75 مىڭ ەۋرو شاماسىنداعى قاراپايىم عانا جارىستىڭ العاشقى اينالىمىندا ول ۇلى­بريتانيالىق چارلز برۋم مەن بەل­گيالىق يوريس دە لورەدەن ايلاسىن اسىردى. كوپ كەشىكپەي بولگاريالىق ديمي­تار كۋزمانوۆتى قاپى قالدىردى – 6:3, 6:3. جارتىلاي فينالدا جەرلەسىمىز فران­تسيالىق ماتتەو مارتينوعا 4:6, 6:7 ەسەبىمەن ەسە جىبەردى.

تاياۋدا عانا قازاقستاننىڭ ازاماتتىعىن العان الەكساندر شەۆچەنكونىڭ دا (№56) جولى بولمادى. جۇلدە قورى 801 335 ەۋرونى قۇ­راعان مارسەلدەگى ءتۋرنيردىڭ تۇساۋكەسەر كەزدەسۋىندە ول فرانتسيالىق بەندجامين بونزيدەن (№126) باسىم تۇسكەنىمەن, ىلە-شالا پولشالىق حۋبەرت حۋركاچتان (№8) 1:6, 4:6 ەسەبىمەن جەڭىلدى. سول سەكىلدى يۋليا پۋتينتسەۆا دا (№69) سەنىم ۇدەسىنەن شىعا المادى. دوحاداعى دودانىڭ تۇساۋكەسەر كەزدەسۋىندە ول اقش-تىڭ وكىلى بەرنارد پەرادان (№86) ايلاسىن اسىرا المادى – 6:7, 4:6.