اي كۇنتىزبەسى بويىنشا كەلەتىن بيىلعى شىعىس جاڭا جىلى –سوللال مەرەكەسى 10 اقپانعا تۋرا كەلەدى, ءدال وسى كۇنى جاسىل اعاش ايداھار جىلى كۇشىنە مىنسە, بىزدە ناۋرىز ايىندا ناعىز ۇلۋ جىلى باستالادى. ەگەر ەلىمىزدە جاڭا جىلدى ءۇش رەت قاتارىنان قارسى الاتىن ۇلت بولسا, ول – قازاقستان كورەيلەرى. ءبىرىنشىسى – كادىمگى گريگوريان كۇنتىزبەسىندەگى جاڭا جىل, ەكىنشىسى – سوللال, ءۇشىنشى – ناۋرىز.
وسىلايشا, بيىل دا وزدەرىن قالجىڭداعاندا ء«تورتىنشى ءجۇز» دەپ تانىستىراتىن قازاقستان كورەيلەر قاۋىمداستىعى الماتىدا اۋقىمدى مەرەكە ۇيىمداستىرىپ, شىعىس جاڭا جىلىن ايتا-ايتا جۇرەرلىكتەي اتاپ ءوتتى. رەسپۋبليكا سارايىندا وتكەن مەيرامعا ەكى مىڭنان استام قوناق, بىرنەشە جۇزدەگەن ونەر مايتالماندارىن جينادى. يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگەن كورەي ۇلتتىق ءانى «اريراننىڭ» 60 شاقتى نۇسقاسى, 3 600-دەي ءتۇرى بولسا, سونىڭ ءبىر عانا ۆارياتسياسىن ءتورت بىردەي – «رودينا», بيدانگيل, «ەدەلۆەيس», «رادۋگا» حور انسامبلدەرى ورىنداسا, «نامسون» حالىقتىق بي ءانسامبلى, «نامسون» بالالار حورى, «حاسساك» ەتنوفولكلورلىق ءانسامبلى, «ساران», «بيدۋلگي» انسامبلدەرى, «Namson family» كورەي ونەرى ستۋدياسى, «ينسام» شوۋ-توبى مەن رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى كورەرمەندەرىنە تاماشا كوڭىل-كۇي دارىتقان ناعىز دۋمانعا بولەدى.
ايتقانداي, الماتىداعى كورەي مۋزىكالىق كومەديا تەاترى قازاقستاندا دا عانا ەمەس, الەمدەگى ەڭ العاشقى ەتنيكالىق جانە كورەي تۇبەگىنەن تىس جەردەگى جالعىز مەملەكەتتىك ءارى ەرەكشە تاعدىرلى تەاتر ەكەندىگىن ايتا كەتۋ كەرەك.
ال ەكى مىڭ جىلدىق تاريحى بار سوللال مەيرامىنا قايتا ورالاتىن بولساق, ول ەڭ باستى ءارى قوعامدىق ماڭىزدى مەرەكە رەتىندە 1989 جىلى عانا رەسمي تىركەلگەندىكتەن, كورەيانىڭ وزىندە سوڭعى 15-20 جىلدا اۋقىمدى دەڭگەيدە تويلانا باستاعان. دەگەنمەن كورەي حالقىنىڭ ۇلكەندەرى اي كۇنتىزبەسى بويىنشا كەلەتىن جاڭا جىلىن ۇمىتتىرماۋ ءۇشىن وتباسىندا دارىپتەپ, ءداستۇر جورالعىلارىن جاساپ وتىرعان دەسەدى.
ىقىلىم زامانداردا سوللال مەيرامى بىرنەشە اپتا قاتارىنان تويلانىپ, ونىڭ العاشقى جانە سوڭعى كۇنى اسا ماڭىزدى بولعاندىقتان, جاستار بيىك قىراتتارعا, توبەگە جۇگىرىپ شىعىپ, كىم ءبىرىنشى تولعان ايدى كورسە – سول ادام جىل بويى باقىتقا كەنەلەدى دەگەن ىرىم بار. ال قازىرگى زاماناۋي كورەيا بۇل مەيرامدى ءۇش كۇن قاتارىنان تويلايدى جانە وتباسىلىق مەرەكە بولعاندىقتان, ءاربىر ادام تۋعان ۇيىنە, اكە-شەشەسىنە اسىعادى. ادەت-عۇرىپ بويىنشا الدىمەن چحارە – وتكەن-كەتكەن اتا-بابالاردى ەسكە الۋ راسىمىنە ارنالعان داستارقان جايىلادى. ەكىنشى ءراسىم – سەبە. ۇلكەندەر مەرەكە كۇنى تاڭەرتەڭ مىندەتتى تۇردە كىشكەنتاي بالالارعا سەبەدون تاراتقان كەزدە ەرەسەكتەر بەتىن وڭتۇستىككە, حانبوكي (ۇلتتىق كيىم) كيگەن بالا-شاعا سولتۇستىككە قاراپ تۇرادى. بالالار جاسىنا قاراي, ۇلكەنىنەن باستاپ ءيىلىپ سالەم بەرىپ, اتا-اجەلەرى باتا, ريزاشىلىق رەتىندە اقشا تاراتادى. وسىدان كەيىن عانا ءۇي ءىشى ءۇشىنشى راسىمگە ورالىپ, ارۋاقتارعا جايىلعان داستارحان باسىنا جينالىپ, دۇنيەدەن وتكەن كىسىلەردەن دەنساۋلىق, وتباسىنىڭ اماندىعىن سۇراپ, دامنەن اۋىز تيەدى. سوللال مەرەكەسىن قىسقاشا سيپاتتاعاندا وسىنداي. ايتپەسە, بۇل مەرەكەدە شاماندار مەن كورىپكەلدەر ساۋەگەيلىك جاساپ, استىقتىڭ تۇسىمىنە, تاعى باسقا دا بولجامدار جاسايتىنى, باسقا دا ۇلتتىق ويىندار تۋرالى قىزىقتى بايانداي بەرۋگە بولادى.
الماتىداعى مەرەكەگە ورالاتىن بولساق, الدىمەن ۇلكەن كونتسەرت قازاقستان رەسپۋبليكاسىنىڭ انۇرانىمەن باستالىپ, دۇرك ەتىپ كوتەرىلگەن وتانداستارىمىزعا قازاقستان كورەيلەرى قاۋىمداستىعىنىڭ توراعاسى, بەلگىلى كاسىپكەر يۋري شين جۇرەكجاردى لەبىزىن ارنادى.
يۋري گەرمانوۆيچ: «جاڭا جىل – وتكەنگە ەسەپ بەرىپ, الداعى كۇندەرگە جوسپار قۇراتىن ۋاقىت قانا ەمەس, قوشتاسقان جىلدا بىزگە قولداۋ بىلدىرگەن, كومەكتەسكەن, بارشامىزدىڭ ورتاق ءۇيىمىز – قازاقستاننىڭ كوركەيۋىنە, كورەيلەر قاۋىمداستىعىنىڭ دامۋىنا ۇلەس قوسقان ءاربىر ادامعا العىس ايتاتىن كۇن!», دەي كەلە, كورەي ءتىلى مەن ءداستۇرىن ۇمىتتىرماي, جالعاستىرىپ كەلە جاتقان قانداستارىنا تاعزىم ەتتى.
قازاقستان كورەيلەرى قاۋىمداستىنىڭ جەتەكشىسى ءبىزدىڭ قوعامدىق جانە ساياسي ءومىرىمىزدىڭ تۇراقتىلىعىنا ەڭبەك ءسىڭىرىپ وتىرعان جاندارعا, مۇعالىمدەرگە, عالىمدارعا, دارىگەرلەرگە, پوليتسيا, اۆياتسيا قىزمەتكەرلەرىنە, ونەر يەلەرىنە, سپورتشىلارعا, وندىرىستەگىلەرگە, ۆولونتەرلەرگە, ەڭ سوڭىندا, كەلەشەگىمىزدى سەنىپ تاپسىراتىن جاستارعا دەيىن العىسىن اياعان جوق.
– ءبىزدىڭ ارقايسىمىز قازاقستاندىقپىز, بويىمىزدا جەتىستىكتەرىمەن بىرگە كەمشىلىكتەرى دە بار قاراپايىم ادامدارمىز. ءبىر شاڭىراقتىڭ استىندا تۋعان ارقايسىمىزدىڭ قازاقستان ازاماتى اتانۋعا قۇقىعىمىز بار. ءبىز ءبارىن بىردەي قۇرمەتتەپ, ءاربىر وتانداسىمىزدى باعالاۋىمىز كەرەك. ءبىز ءارتۇرلىمىز, بىراق تەڭبىز جانە ءبىرتۇتاسپىز. ءسىز بەن ءبىز ءۇشىن, بالالارىمىزدىڭ, ەلىمىزدىڭ جارقىن بولاشاعى ءۇشىن ەلىمىزدى ءسۇيىپ, ونىڭ ءار قالاسىنا, ءار اۋىلىنا سەنەيىك. اۋىزبىرشىلىكتىڭ كۇشىمەن ەلىمىزدىڭ ابىرويىن اسقاقتاتا بەرەيىك. ويتكەنى ءبىز ۇلى جاۋىنگەرلەردىڭ ۇرپاعىمىز! ۇلى دالا, ۇلى ەل, ۇلى قازاقستان, سوللال مەرەكەسى قۇتتى بولسىن! – دەدى يۋري شين.
قۇتتىقتاۋلار لەگىن وڭتۇستىك كورەيانىڭ الماتىداعى كونسۋلدىعىنىڭ باس كونسۋلى پاك نەچحون جالعاستىردى. سالتاناتتى وقيعا اياسىندا «نامسون» كورەي بي انسامبلىنە مادەنيەت جانە اقپارات مينيسترلىگىنىڭ پارمەنىمەن «حالىقتىق» (ۇلگىلى) كوركەمونەرپازدار ۇجىمى اتاعى بەرىلىپ, مارتەبەلى سىيلىق انسامبل جەتەكشىسى مارينا كيمگە تاپسىرىلدى.
قۇتتىقتاۋلار ساحنانى ەرتەگىدەي الەمگە الماستىرعان, بۇكىل مۋزىكالىق تەحنولوگيالاردىڭ تابىسىن توعىستىرعان عالامات كونتسەرتكە ۇلاستى.
الماتى