پرەزيدەنت قاسىم-جومارت توقاەۆ قازاقستان حالقىنىڭ جانە جەكە ءوزىنىڭ اتىنان يبراحيم رايسي مەن يراندىقتاردى ءتول مەرەكەسى – يسلام رەۆوليۋتسياسى كۇنىمەن قۇتتىقتادى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«بۇگىندە يران ساياسي تۇعىرى بەرىك, ەكونوميكاسى تۇراقتى دامىعان حالىقارالىق قاۋىمداستىقتىڭ بەدەلدى مۇشەسى. ۇلت بىرلىگى مەن ىنتىماعىن تۋ ەتكەن مەملەكەتىڭىز ءسىزدىڭ باسشىلىعىڭىزبەن الداعى ۋاقىتتا دا يگى ماقسات-مۇراتتارعا جەتە بەرۋىنە تىلەكتەسپىن. يران – ءبىزدىڭ كاسپي ايماعىنداعى ماڭىزدى سەرىكتەسىمىزدىڭ ءبىرى. وسىعان وراي ءداستۇرلى دوستىق پەن مازمۇندى ساياسي ديالوگقا نەگىزدەلگەن ىقپالداستىعىمىز ءوزارا ءتيىمدى ساۋدا-ەكونوميكالىق جانە مادەني-گۋمانيتارلىق ىنتىماقتاستىعىمىزدى نىعايتۋعا بەرىك ارقاۋ بولا بەرەتىنىنە كامىل سەنەمىن», دەگەن ق.توقاەۆ يران حالقىنا ىنتىماق, قۇت بەرەكە تىلەپ, يبراحيم ءرايسيدىڭ جاۋاپتى قىزمەتىنە تولاعاي تابىس تىلەدى.