قىس ەلدىڭ اپشىسىن قۋىرا كەلدى. قاڭتاردىڭ باسىندا قاقاعان اياز اپتالاپ تۇرىپ الدى. كوكشەنىڭ كوپ كولى سىرەسە قاتتى. مامانداردىڭ ايتۋىنا قاراعاندا, كوك مۇزدىڭ قالىڭدىعى كەي جەردە 70-80 سانتيمەتر بولسا, دالالىق كولدەردە مەترگە جۋىق.
سۋ استىنداعى تىرشىلىكتى ساقتاپ قالۋ ءۇشىن وتتەگى قاجەت. سىرما بوران قار اتاۋلىنى قامىس ىشىنە قۋىپ تىققان. دالا توسىندەگى كوك مۇز قۇرسانعان كولگە جەتۋدىڭ ءوزى وڭاي-وسپاق شارۋا ەمەس. بارماي تاعى بولمايدى. تايىز كولدەردەگى بالىق اتاۋلى تۇنشىعىپ, باۋداي ءتۇسۋى ابدەن ىقتيمال. قازىر وڭىردەگى 600-گە جۋىق سۋ ايدىنىنىڭ ەلۋگە تاياۋىندا اەراتسيا جۇمىسى جۇرگىزىلىپ جاتىر.
قىس جاڭا تۇسكەندە بۇل جۇمىستى جۇرگىزۋگە بولمايتىن ەدى. قايمىجىقتاي مۇز قاۋىپتى. قالىڭدىعى 40-50 سانتيمەترگە جەتۋى كەرەك, ايتپەسە تەحنيكانى كوتەرە المايدى. قازىر بۇل قاۋىپتىڭ قاتەرى سەيىلگەن. كەز كەلگەن كولدەگى مۇزدىڭ قالىڭدىعى 70 سانتيمەتردەن كەم ەمەس. سۋ ايدىندارىن پايدالانۋشىلار اۋامەن قورەكتەندىرۋ جۇمىسىنا كىرىسىپ كەتتى. بۇل يگى ءىس كوگەرىپ كوكتەم كەلگەنشە جالعاسادى.
– تاياۋدا عانا زەرەندى اۋدانىنداعى قۇمدىكولگە بارىپ كەلدىك. ەكى موتوپومپامەن جۇمىس ىستەدىك. قازىر ءاربىر اۋدانداعى ينسپەكتور كولدەردى باقىلاۋعا الىپ, قاداعالاپ جاتىر. كول مۇزىن ويىپ, ويىققا قامىس تىعىپ, سۋ استىنا اۋا وتەتىندەي ارەكەت جاساپ جاتىرمىز, – دەيدى «ەسىل» وبلىسارالىق باسسەيندىك بالىق شارۋاشىلىعى ينسپەكتسياسىنىڭ ءبولىم باسشىسى نۇرلان كەۋلىمجاەۆ.
مامانداردىڭ ايتۋىنا قاراعاندا, سۋ استىنداعى وسىمدىكتەرگە كۇننىڭ نۇرى جەتكىلىكتى دەڭگەيدە تۇسپەگەندىكتەن, وتتەگىنىڭ ورنىنا كومىرتەگى كوبىرەك بولىنەدى ەكەن. بالىق بىتكەننىڭ ەركىن تىنىس الۋىنا بوگەت. سوندىقتان كوكشەتاۋ وڭىرىندەگى سۋ ايدىندارىنىڭ نەگىزى تايىز, دالالىق كولدەر ەكەنىن ەسكەرە وتىرىپ, وتتەگىمەن قورەكتەندىرۋ قاجەتتىگى تۋىندايدى. بۇل ىسكە كول جاعالاي قونعان كوپشىلىك تە اتسالىسسا قۇبا-قۇپ.
اقمولا وبلىسى