شۆەيتساريادا شپاگامەن سەمسەرلەسۋدەن جاسوسپىرىمدەر اراسىنداعى الەم كۋبوگى اياقتالدى. بۇل جارىستا قازاقستان قۇراماسى پولشا, شۆەيتساريا جانە اقش سپورتشىلارىن ۇتىپ, اقتىق سىنعا دەيىن القىنباي جەتتى. فينالدا جەرلەستەرىمىز ايگىلى ماجارستان قۇراماسىنا ەسە جىبەرىپ, كۇمىس مەدالدى ولجالادى. ءبىزدىڭ كوماندانىڭ ساپىندا بوگدان لۋكين, الەكسەي كاساتكين جانە كيريلل پروحودوۆ سىندى سايىپقىراندار ونەر كورسەتتى.
بىرىككەن اراب امىرلىكتەرىنىڭ ء(باا) فۋدجەيرا قالاسىندا تاەكۆوندودان G2 ساناتىنداعى حالىقارالىق تۋرنير اياقتالدى. پارسى شىعاناعىنا اتتانعان وتاندىق تاتامي شەبەرلەرىمىز ەلگە ولجالى ورالدى. اتاپ ايتساق, امانبول بەگىمبەتوۆ (63 كگ), ياسمينا نارباەۆا (62 كگ) جانە جانسەل دەنيز (73 كگ) فينالدا عانا ۇتىلىپ, كۇمىس مەدالدى موينىنا ءىلدى. ال جارتىلاي فينالدا سۇرىنگەن باتىرحان تولەۋعالي (80 كگ), بەكسۇلتان مۇساحان (68 كگ), ەراسىل ورىنباسار (74 كگ) جانە نۇرلان مىرزاباەۆ (87 كگ) قولاعا قول سوزدى.
حالىقارالىق فۋتبول فەدەراتسياسى (فيفا) 2026 جىلى اقش, كانادا جانە مەكسيكادا جالاۋى جەلبىرەيتىن الەم چەمپيوناتىنىڭ نەگىزگى ويىندارى قاي جەرلەردە وتەتىنىن جاريا ەتتى. باس جۇلدە ءۇشىن تارتىس اقش-تىڭ نيۋ-دجەرسي شتاتىنا قاراستى يست-راتەرفورد قالاسىنداعى «مەتلايف-ستەديۋمدە» ۇيىمداستىرىلادى. بۇل ستاديون 82,2 مىڭ كورەرمەنگە ەسەپتەلگەن. قولا مەدال ءۇشىن تارتىستى فلوريدا شتاتىنا قاراستى مايامي قالاسىنداعى «حارد روك ستەديۋم» قابىلدايدى. اتالعان سپورتتىق نىسان 65 326 ادامدى سىيدىرا الادى.
قاتاردىڭ باس شاھارى دوحادا سۋ سپورتىنان الەم چەمپيوناتى ءوتىپ جاتقانى بەلگىلى. كۇنى كەشە عانا ارتىستىك جۇزۋدەن قۇرامىندا نارگيزا بولاتوۆا مەن ەدۋارد كيم سىندى دۇلدۇلدەرى بار قازاقستان قۇراماسى ارالاس جۇپتار سايىسىندا تاريحي التىنعا قول جەتكىزگەنى تۋرالى جازعان ەدىك. ەندىگى ءۇمىت – جۇزۋشىلەردە. 11 اقپاندا باستالاتىن جارىستا ادىلبەك مۋسين, ەگور پوپوۆ, ماكسيم سكازوبتسوۆ, ارسەن قوجاحمەتوۆ, ادەلايدا پچەلينتسەۆا, كسەنيا يگناتوۆا, سوفيا سپودارەنكو جانە ديانا تاسجانوۆا ونەر كورسەتەدى. سول باسەكەدە تاعى ءبىر جۇلدە الۋدى جوسپارلاپ وتىرمىز. وسى ورايدا ادىلبەك مۋسين مەن ادەلايدا پچەلينتسەۆاعا ايرىقشا سەنىم ارتىلىپ وتىر.
18 اقپاندا ماسكەۋدەگى «ۆتب ارەنادا» باسكەتبولدان ۆتب بىرىڭعاي ليگاسىنىڭ «جۇلدىزدار ماتچى» وتەدى. اتالعان جارىسقا بارلىعى 24 ويىنشى قاتىسادى. سولاردىڭ اراسىندا «استانانىڭ» نامىسىن قورعاپ جۇرگەن امەريكالىق لەگيونەر رويس حەمم دە بار. شابۋىل شەبىندە ونەر كورسەتەتىن باسكەتبولشىنىڭ جاسى – 24-تە, بويى – 202 سانتيمەتر, سالماعى – 102 كگ.
تاياۋدا اقش-تىڭ لاس-ۆەگاس قالاسىندا ارالاس جەكپە-جەكتەن وتكەن UFC تۋرنيرىندە كۇش سىناسىپ, جەرگىلىكتى فايتەر چارلز دجونسوننان جەڭىلگەنىنە قاراماستان قازاق سپورتشىسى ازات ماقسۇم 66 مىڭ دوللار كولەمىندە تابىس تاپتى. ونىڭ 12 مىڭىن جەكپە-جەككە شىققانى جانە 50 مىڭىن وسى ايقاس ەڭ ۇزدىك دەپ تانىلعانى ءۇشىن الدى. تاعى 4 مىڭى – دەمەۋشىلەر تاراپىنان بەرىلگەن بونۋس. ال دجونسون 78 مىڭ دوللار شاماسىندا ولجاعا كەنەلدى.
كاسىپقوي رينگتە 16 كەزدەسۋ وتكىزىپ, بارلىعىندا جەڭىسكە جەتىپ, 11 قارسىلاسىن نوكاۋتقا جىبەرگەن 28 جاستاعى امەريكالىق وستين ۋيليامس ورتا سالماقتا WBO مەن IBF نۇسقالارى بويىنشا الەم چەمپيونى اتانىپ وتىرعان جانىبەك ءالىمحان ۇلىن جەكپە-جەككە شاقىردى. 30 جاستاعى قازاقتىڭ ۇلى دا جەڭىلىستىڭ كەرمەك ءدامىن تاتقان ەمەس. ول 15 باسەكەنىڭ 10-ىن مەرزىمىنەن بۇرىن اياقتادى. ۋيليامس ءوزىنىڭ سوڭعى كەزدەسۋىن 4 اقپاندا لاس-ۆەگاستا گەرمانيانىڭ وكىلى ارمەل مبۋمبا-ياسساعا (10-1, 7 كو) قارسى وتكىزىپ, ونى التىنشى راۋندتا ۇرىپ جىقتى.