سارسەنبىدەن بەيسەنبىگە قاراعان ءتۇنى الماتىنىڭ مەدەۋ اۋدانىنا قاراستى «تاۋ سامالى» شاعىناۋدانى, وليمپيسكايا كوشەسىنىڭ بويىندا تەحنوگەندىك توپىراقتىڭ لايلانۋى سالدارىنان لاي كوشكىنى ءجۇردى. اپاتتان تاۋ بوكتەرىندە ورنالاسقان ەكى بىردەي جەكە تۇرعىن ءۇي زارداپ شەگىپ, ىشىندە ءتورت تۇرعىنى بار ءبىر ءۇي توپىراق استىندا قالدى. وكىنىشكە قاراي, ءتىلسىز جاۋدان ءبىر وتباسىنىڭ مۇشەلەرى تۇگەل قازا تاپتى.
ءمالىم بولعانداي, اپاتتان زارداپ شەككەن شاڭىراقتا 1980 جانە 1984 جىلى تۋعان ەرلى زايىپتىلار مەن ولاردىڭ 2007 جىلى دۇنيەگە كەلگەن ەگىز ۇلى بولعان. ولاردى ىزدەستىرۋ شارالارى بىرنەشە ساعاتقا سوزىلدى. قۇتقارۋ جۇمىسىنا «قازسەلدەنقورعاۋ» مەملەكەتتىك مەكەمەسى, الماتى قالاسى «109 قۇتقارۋ قىزمەتى», رەسپۋبليكالىق جەدەل-قۇتقارۋ جاساعى, توتەنشە جاعداي دەپارتامەنتىنىڭ جەدەل جاردەم بريگاداسى, مەدەۋ اۋدانى اكىمدىگىنەن 160 ادام جانە 32 تەحنيكا جۇمىلدى. جاقىن ماڭداعى ۇيلەردىڭ تۇرعىندارى №47 ورتا مەكتەپكە ەۆاكۋاتسيالانىپ,ولاردىڭ كەيبىرى ءوز ەرىكتەرىمەن تۋىستارىنىڭ ۇيىنە كەتكەن. مارقۇمداردىڭ تۋىستارى مەن كورشىلەرىنە شۇعىل پسيحولوگيالىق كومەك كورسەتىلدى.
وقيعا ورنىنا كەلگەن قالا اكىمى ەربولات دوساەۆ ب ۇلىنگەن عيماراتتاردى ارالاپ, شۇعىل كوشپەلى كەڭەس وتكىزدى. اكىمنىڭ تاپسىرماسىمەن وقيعانىڭ سەبەپتەرىن تەكسەرۋ جانە لاي كوشكىنى سالدارىن جويۋعا ارنايى توپ قۇرىلدى. تەرەڭدىگى 1 مەترگە جۋىق جۇقا توپىراق قاباتىنىڭ جولاعى, اۋىرلىق كۇشىنىڭ اسەرىنەن ەرىگەن قارمەن قانىعىپ, باۋرايدان تومەن قاراي سىرعىعان.
«قۇتقارۋشىلار قيراعان ۇيدە تۇرعان وتباسى مۇشەلەرىن ىزدەستىرۋ جۇمىستارىن اياقتادى. قايعىلى وقيعا ءتورت ادامنىڭ ءومىرىن قيىپ وتىر. قازا بولعان جانداردىڭ جاقىندارىنا قايعىرا كوڭىل ايتامىن. وتباسىنىڭ بارلىق مۇشەسىن جەرلەۋدى ۇيىمداستىرۋ ءۇشىن كومەك كورسەتىلەدى. قازىرگى ۋاقىتتا ەلدەن تىس جەردە وقيتىن قازا بولعان وتباسىنىڭ ۇلكەن ۇلىنا ءبىلىم الۋعا جانە كەلگەن سوڭ ءومىر سۇرۋىنە ماتەريالدىق قولداۋ كورسەتىلەدى», دەدى ەربولات دوساەۆ.
الماتى قالاسى مەن الماتى وبلىسىنىڭ تاۋلى اۋداندارىندا مۇنداي قاۋىپتى ورىندار از ەمەس. كەيبىر اۋماقتارداعى تۇرعىن ۇيلەر ءتىپتى تاۋدىڭ قيا بەتكەيىندە ورنالاسقان. قيراعان ۇيگە جاقىن ماڭدا تۇراتىن ايشاگۇل ەرمانوۆا, مۇندا 10 جىل بۇرىن وسىنداي وقيعادان ءبىر اجەي قايتىس بولعانىن, قىستىڭ سوڭى مەن كوكتەم ايلارىندا جاندارىن شۇبەرەككە ءتۇيىپ وتىراتىنىن جەتكىزدى.
مەدەۋ اۋدانىنىڭ اكىمى ەركەبۇلان ورازالين كوشكىن بولعان «تاۋ سامالى» شاعىن اۋدانىنداعى ينجەنەرلىك جەلىلەردىڭ جاعدايىنا بايلانىستى تۇسىنىكتەمە بەردى.
«قازىر «تاۋ-سامالى» شاعىن اۋدانىندا جەكە سەكتوردىڭ كوممۋنيكاتسيالارعا قوسىلۋى رەتسىز ءارى قاۋىپتى. جەكە سەكتورداعى كوپتەگەن تاراتۋ جەلىسى ستاندارتتارعا سايكەس كەلمەيدى. جاقىن ارادا بۇل ماسەلەنى شەشۋ ءۇشىن ءبىز وتكەن جىلدان باستاپ تاراتۋ جەلىلەرىن سالۋ جوباسىن ازىرلەۋگە كىرىسكەن بولاتىنبىز. ءبىز «بالقاش» سۋ كوزىن كورسەتتىك, جاڭا ۇڭعىمالار – بۇل ءبىرىنشى كەزەڭ. ەكىنشى كەزەڭ – تاراتۋ جەلىلەرىن جۇرگىزۋ جانە سۋ قۇبىرىمەن قاتار كارىز جەلىلەرىن سالۋ, ويتكەنى تاۋلى جەرلەردە سەپتيكتەردى پايدالاناتىن جەكە ۇيلەر قاۋىپسىز ەمەس», دەيدى ە.ورازالين.
الماتى