شۆەيتساريانىڭ بازەل قالاسىندا جاسوسپىرىمدەر اراسىندا وتكەن شپاگامەن سەمسەرلەسۋدەن الەم كۋبوگىنىڭ كەزەڭدىك سايىسى اياقتالدى.
بۇل جارىستا ەلىمىزدىڭ جاس ورەندەرى وزدەرىن جاقسى قىرىنان كورسەتتى. قۇرامىندا بوگدان لۋكين, الەكسەي كاساتكين جانە كيريلل پروحودوۆ سىندى تاستۇلەكتەرى بار جەرلەستەرىمىز باستاپقى باسەكەلەردە پولشا مەن شۆەيتساريانى ۇتسا, جارتىلاي فينالدا اقش سپورتشىلارىنا سان سوقتىردى. بىراق اقتىق سىندا ماجارستانعا ەسە جىبەردىك. ءسويتىپ, بازەلدەگى باسەكەدە قازاقستاننىڭ سەمسەرلەسۋشىلەرى كۇمىس مەدالدى يەلەندى.
الداعى ۋاقىتتا وتانداستارىمىزدى كوپتەگەن ءىرى حالىقارالىق جارىس كۇتىپ تۇر. ولاردىڭ اراسىنداعى ەڭ ىرىلەرى – الەم كۋبوگىنىڭ كەزەڭدىك باسەكەلەرى, الەم جانە ازيا بىرىنشىلىكتەرى. سول ءدۇبىرلى دودالاردا دا ءبىزدىڭ ۇل-قىزدار جەڭىس تۇعىرىنا كوتەرىلەدى دەپ ۇمىتتەنەمىز.