بۇگىندە وزبەكستاننىڭ باس شاھارى تاشكەنتتە ەرلەر مەن ايەلدەر اراسىندا ازيا چەمپيوناتى ءوتىپ جاتىر.
اتالعان جارىستا 34 مەملەكەتتەن كەلگەن 200-گە تارتا ۇمىتكەر باق سىناپ جاتىر. كەشە قازاقستان قۇراماسىنىڭ قورجىنىنا ءبىر جۇلدە ءتۇستى. 67 كگ سالماقتاعى سايرامكەز اقمولدا قوسسايىستىڭ قورىتىندىسى بويىنشا 292 كگ (126+166) زىلتەمىردى ەڭسەرىپ, كۇمىس مەدالدى موينىنا ءىلدى. قانداسىمىز تەك ري ۆون دجيدەن عانا قالىپ قويدى. سولتۇستىك كورەيادان كەلگەن سپورتشى 317 (137+180) كگ سالماقتى باعىندىردى. تايلاندتىڭ وكىلى تراۆاتا راتفەتا قولاعا قول سوزدى. ول 286 كگ (128+158) سالماقتى تىك كوتەردى. بۇل باسەكەلەر 10 اقپانعا دەيىن جالعاسادى.
قۇرلىق چەمپيوناتى بارىسىندا وليمپيا ويىندارىنىڭ جۇلدەلەرى ساراپقا سالىناتىندىقتان, ونى تاماشالاۋ ءۇشىن حالىقارالىق اۋىر اتلەتيكا فەدەراتسياسىنىڭ پرەزيدەنتى مۇحامماد حاسان دجالۋد, ازيانىڭ پرەزيدەنتى مۋحامماد يۋسۋف ال مانا جانە تاعى باسقا لاۋازىم يەلەرى تاشكەنتكە ارنايى ات باسىن بۇردى.