سەنات دەپۋتاتى نۇرتورە ءجۇسىپ ەل ۇكىمەتىنىڭ جاڭا باسشىسى ولجاس بەكتەنوۆكە تىلەك رەتىندە Facebook الەۋمەتتىك جەلىسىندەگى پاراقشاسىندا جازبا جاريالادى, دەپ حابارلايدى Egemen.kz.
«ولجاس بەكتەنوۆ تۋرالى ايتار بولساق, بىرىنشىدەن, قىرىقتىڭ قىرقاسىندا قىلشىلداپ تۇرعان جاس ادام. بۇعان دەيىن اقوردادا اپپارات باسشىسى, وعان دەيىن انتيكوردا قىزمەت اتقاردى. وڭىردە دە جۇمىس ىستەدى. ءبىر سوزبەن ايتقاندا شارۋانىڭ جايىن دا, حالىقتىڭ جاعدايىن دا جاقسى بىلەدى. ەكىنشىدەن, قاي جەردە ىستەسە دە ارتىنان جامان ءسوز ەرمەگەن كىسى. تازالىق پەن تۋرالىق جولىندا جامان اتى شىقپاعان. ۇشىنشىدەن, مەملەكەت باسشىسى الداعى ۋاقىتتا قازاقستان ەكونوميكاسىنىڭ تابىسىن 2 ەسە ارتتىرۋ مىندەتىن قويدى», دەپ جازدى نۇرتورە ءجۇسىپ.
سەناتوردىڭ ايتۋىنشا, بۇل وڭاي مىندەت ەمەس. بۇعان جىگەرلى, تاباندى, ءبىر ءسوزدى باتىل ادام قاجەت.
«ولجاس اباي ۇلىنىڭ بويىندا بۇل قاسيەتتەر بار. پرەزيدەنت تە ءوز سوزىندە وسى قاسيەتتەرىن اتاپ ءوتتى. بەكتەنوۆ ءىستىڭ ادامى سەكىلدى, كوپ سويلەمەيدى. سويلەسە تۋراسىن ايتادى. «ادامدارعا جاقسى باسپانا مەن جولدار كەرەك. قولجەتىمدى جەر مەن ىشەتىن سۋ كەرەك. ساپالى ءبىلىم مەن مەديتسينا قاجەت. ءادىل سوت پەن ءومىر سۇرۋگە قاۋىپسىز ورتا كەرەك. ال ءبىز ەشتەڭە ەستىمەگەندەي سىڭاي تانىتامىز جانە «ادەمى» ستاتيستيكاعا قۇرىلعان جۇمىستى جالعاستىرامىز» دەگەن ءسوزى بار. ماڭىزدىسى - قوعامداعى تازالىق!», دەپ پىكىر ءبىلدىردى نۇرتورە ءجۇسىپ.
سونداي-اق سەناتور پرەزيدەنت ىلعي ايتىپ كەلە جاتقان «ادىلەتتى قازاقستان» قاعيداتى ورنىعۋى ءۇشىن ۇكىمەت باسشىسىنىڭ جەكە ازاماتتىق ۇستانىمى دا ماڭىزدى ەكەنىن تىلگە تيەك ەتتى.
«سالىق كودەكسى مەن مەملەكەتتىك ساتىپ الۋ تۋرالى زاڭنامالاردى جەدەل رەتكە كەلتىرۋ وتە ماڭىزدى. سوسىن ۇكىمەتكە ايماقتاردا ابدەن ىسىلعان, تاجىريبە جيناقتاعان, ادال, ارلى ازاماتتاردى تارتۋ ارقىلى حالىققا جانى اشيتىن, ەلگە جاقىن كوماندا جاساقتاسا ءجون بولار ەدى!», دەپ ويىن ءبىلدىردى نۇرتورە ءجۇسىپ.