كولىك ءمينيسترى مارات قاراباەۆ باستاعان وتاندىق دەلەگاتسيا رۋمىنياعا جاساعان ءىسساپارى اياسىندا كونستانتسا پورتىنداعى كولىك-لوگيستيكالىق بيزنەس-فورۋمعا جانە حالىقارالىق اۆتوموبيل تاسىمالدارى جونىندەگى بىرلەسكەن كوميسسيانىڭ وتىرىسىنا قاتىستى. اتالعان فورۋم اياسىندا رۋمىنيانىڭ بيزنەس وكىلدەرىمەن ۆ2ۆ فورماتىندا كەزدەسۋلەر وتكىزدى.
بالتىق جاعالاۋىندا بولعان ءىس-شارالارعا قازاقستان تاراپىنان ۆيتسە-مينيستر تالعات لاستاەۆ, تەمىرجول جانە سۋ كولىگى كوميتەتىنىڭ توراعاسى ولجاس ساپاربەكوۆ, KTZ Express اق, «اقتاۋ تەڭىز ساۋدا پورتى» ۇك, «ترانسكاسپي حالىقارالىق كولىك مارشرۋتىنىڭ» حالىقارالىق قاۋىمداستىعى, Semurg Invest, Dar Rail جانە PTC Holding جشس باسشىلىعىنىڭ وكىلدەرى قاتىستى.
فورۋمدا ءسوز سويلەگەن مينيستر م.قاراباەۆ قازاقستان كولىك سالاسىن دامىتۋعا, ازيادان ەۋروپاعا بارار جولدا ترانزيتتىك تاسىمالداردىڭ جىلدامدىعى مەن ساپاسىن ارتتىرۋعا بارلىق جاعدايدى جاساپ جاتقانىن اتاپ ءوتتى. سونداي-اق ول بيزنەس وكىلدەرىنىڭ كەزدەسۋى قازاقستان مەن رۋمىنيا اراسىنداعى اۆتوتاسىمالدار سالاسىنا جاڭا سەرپىن بەرەدى دەگەن سەنىمىن ءبىلدىردى.
بۇل كۇنى وتاندىق دەلەگاتسيا رۋمىنيا كولىك جانە ينفراقۇرىلىم ءمينيسترىنىڭ ورىنباسارى ادريان فوگيشتىڭ سۇيەمەلدەۋىمەن كونستانتسا قالاسىنداعى رۋمىنياداعى ءىرى پورتتىڭ قىزمەتىمەن تانىستى. تەڭىز-وزەن پورتىنىڭ 156 ايلاعى جانە ەكى جالپىەۋروپالىق كولىك ءدالىزىنىڭ قيىلىسىندا قولايلى گەوگرافيالىق ورنى بار. پورتتىڭ جانىندا ميديا جانە مانگاليا سىندى ەكى سپۋتنيكتىك پورت ورنالاسقان. اتالعان پورتتىڭ قۋاتى جىلىنا 100 ملن توننا جۇكتى قۇرايدى.
كونستانتسا پورتىنىڭ مۇمكىندىكتەرى مەن ارتىقشىلىقتارى ترانسكاسپي حالىقارالىق كولىك مارشرۋتىنىڭ الەۋەتىن اشۋدا, سونداي-اق ترانزيتتىك جۇك اعىندارىنىڭ كولەمىن ءوزارا ۇلعايتۋ جانە مۋلتيمودالدى تاسىمالدار مەن لوگيستيكالىق ۇدەرىستەر سالاسىنداعى وزىق تاجىريبەمەن الماسۋ ءۇشىن قازاقستان مەن رۋمىنيا اراسىنداعى ىنتىماقتاستىقتى ودان ءارى نىعايتۋدا ماڭىزدى ءرول اتقارا الادى.