بۇل كۇندەرى استاناداعى جاقسىلىق ۇشكەمپىروۆ اتىنداعى جەكپە-جەك سارايىندا كۇرەس تۇرلەرىنەن قازاقستان چەمپيوناتى ءوتىپ جاتىر. جارىستى ادەتتەگىدەي «كلاسسيكتەر» باستادى. ولار ەكى كۇن بويى بەلدەسىپ, 10 سالماق دارەجەسىندە مىقتىنى انىقتادى.
جارىستىڭ العاشقى كۇنى جانكۇيەرلەر قىزىلوردالىق ولجاس سىرلىباي مەن قوستانايلىق يۋسۋف ماتسيەۆتىڭ تارتىسىن تاعاتسىزدانا كۇتتى. 97 كگ سالماق دارەجەسىندە كۇش سىناساتىن بۇل بالۋانداردىڭ ەسىمى كوپشىلىككە ەتەنە تانىس. ولجاس – ەلىمىزدىڭ بىرنەشە دۇركىن چەمپيونى, قۇرلىق بىرىنشىلىگىنىڭ جۇلدەگەرى. يۋسۋف – جاستار اراسىنداعى (U-20) الەم چەمپيوناتىنىڭ كۇمىس جۇلدەگەرى. ساقا سپورتشى مەن جالىندى جاس ابدەن تىرەسكەنىمەن ءبىر-ءبىرىن الا المادى. ەسەپ – 1:1. كۇرەس تۇرلەرىنىڭ ەرەجەسى بويىنشا سوڭعى ۇپايدى كىم السا, جەڭىس سونىڭ ەنشىسىنە جازىلادى. بۇل رەتتە سىرلىبايدىڭ اسىعى الشىسىنان ءتۇستى. ماتسيەۆ كۇمىسپەن كۇپتەلسە, الماتىلىق يسلام ۋماەۆ پەن قاراعاندىلىق ەرۇلان ىسقاقوۆ قولا مەدالدى قاناعات تۇتتى.
ازيا چەمپيوناتىنىڭ ەكى دۇركىن جانە يسلام ىنتىماقتاستىعى ويىندارىنىڭ جۇلدەگەرى, جاسوسپىرىمدەر مەن جاستار اراسىنداعى الەم بىرىنشىلىگىندە ءۇشىنشى ورىندى يەلەنگەن امانعالي بەكبولاتوۆ 55 كگ سالماق دارەجەسىنىڭ باستى ءفاۆوريتى سانالدى. الايدا اتالعان جارىستا ول جەڭىس تۇعىرىنا كوتەرىلە المادى. جارتىلاي فينالدا استانالىق ايبەك ايتبەكتەن ايلاسىن اسىرا الماعان امانعالي ءۇشىنشى ورىن ءۇشىن تارتىستا الماتى وبلىسىنىڭ وكىلى ەربول كامايلەۆتەن ۇتىلدى. ناتيجەسىندە, اسا جەڭىل سالماقتا جەتىسۋلىق نۇرزات قابدىراحيموۆقا تەڭ كەلەر ەشكىم تابىلمادى. فينالدا ول ايتبەكوۆتى ۇتتى. كاماليەۆپەن قاتار, تۇركىستاندىق قاسىم ادەن قولا مەدالدى موينىنا ءىلدى.
بىلتىر قازاقستان سپارتاكياداسىندا قارسىلاس شاق كەلتىرمەگەن مۇحامەدالى مامىربەك بۇل جولى دا جەڭىس تۇعىرىنىڭ ەڭ بيىك ساتىسىنا كوتەرىلەدى دەپ توپشىلاعان ەدىك. بىراق ولاي بولمادى. شىمكەنتتىك بالۋان 63 كگ سالماقتىڭ جارتىلاي فينالىندا وسكەمەندىك دياس اسكەربايدان ۇتىلدى. ناتيجەسىندە, مامىربەك قوستانايلىق ايبەك ەسمۇراتوۆپەن بىرگە ءۇشىنشى ساتىعا تۇراقتادى. ال فينالدا دياس جامبىلدىق ەرجەت جارىلقاسىننان وڭباي جەڭىلدى.
73 كگ سالماقتا نيكولاي حاپكونىڭ مەرەيى ۇستەم بولدى. سولتۇستىك ءوڭىرىنىڭ تۋماسى شەشۋشى تۇستا الماتى وبلىسىنىڭ وكىلى ەراسىل نۇربوسىنوۆتى قاپى قالدىردى. وسكەمەندىك ەلدوس كامەلەۆ پەن شىمكەنتتىك ءادىلحان ساتاەۆ قولا جۇلدەنى ەنشىلەدى. 82 كگ سالماقتا ەۆگەني پوليۆادوۆتىڭ ەكپىنىنە ەشكىم شىدامادى. جاسوسپىرىمدەر وليمپياداسى مەن جاستاردىڭ الەم بىرىنشىلىگىندە جۇلدە العان اتىراۋلىق ارلان جەتىسۋ وبلىسىنىڭ جاس جولبارىسى ءالمير تولەباەۆتى ءبىر عانا ۇپاي ايىرماشىلىعىمەن جەڭدى. جامبىلدىق تارلاس ءاشىرحانوۆ پەن قوستانايلىق ميراس بارشىلىقوۆ ءۇشىنشى ورىندى يەمدەندى.
جارىستىڭ ەكىنشى كۇنى جانكۇيەرلەر 67 كگ سالماق دارەجەسىندەگى المات كەبىسپاەۆ پەن مەيىرجان شەرماحانبەتتىڭ ايقاسىن كورۋگە ەرەكشە قۇشتارلىق تانىتتى. بۇل بالۋانداردىڭ ەكەۋىنىڭ دە باعىندىرعان بەلەسى زور. اتاپ ايتساق, 36 جاستاعى المات الەم چەمپيوناتىندا – 5 (1 كۇمىس, 4 قولا), ازيا چەمپيوناتىندا – 6 (2 التىن, 3 كۇمىس, 1 قولا), ازيا ويىندارىندا – 2 (1 كۇمىس, 1 قولا) جانە دۇنيەجۇزىلىك ۋنيۆەرسيادادا 1 رەت (1 قولا) جەڭىس تۇعىرىنا كوتەرىلدى. 2012 جىلى ول توكيو جانە 2016 جىلى ريو-دە-جانەيرو وليمپيادالارىنا قاتىستى. 27 جاستاعى مەيىرجاننىڭ الەم چەمپيوناتىنىڭ قولا, ازيا بىرىنشىلىگىنىڭ جەڭىمپازى جانە كۇمىس جۇلدەگەرى, ازيا ويىندارىنىڭ ءفيناليسى دەگەن اتاعى بار.
استانادا قوس ءدۇلدۇلدىڭ جولى شيرەك فينالدا قيىستى. بۇل تارتىس 9:4 ەسەبىمەن شەرماحامبەتتىڭ پايداسىنا شەشىلدى. شىمكەنتتىڭ شىمىر جىگىتى اقتىق سىندا كادەتتەردىڭ ازيا چەمپيونى, جاستاردىڭ الەم بىرىنشىلىگىنىڭ قولا جۇلدەگەرى, جامبىلدىق دىنمۇحامەد قوشقارمەن كۇش سىناستى. بۇل ءبىر كەرەمەت بەلدەسۋ بولدى. باسەكە باستالعان بەتتە مەيىرجان ەكى ۇپاي السا, سول مەزەتتە قارسىلاسى ونى شىر اينالدىرىپ, التى ۇپاي يەلەندى. بىراق سوعان بولا مەيىرجاننىڭ سالى سۋعا كەتكەن جوق. ءبىرىنشى كەزەڭنىڭ سوڭعى مينۋتىندا شەرماحانبەت قوشقاردى الىپ ۇرىپ, قوس جاۋىرىنىمەن جەرگە قادادى. تازا جەڭىس! ءۇشىنشى ورىندى قاراعاندىلىق المات كەبىسباەۆ پەن الماتى وبلىسىنىڭ نامىسىن قورعاعان الماتبەك امانبەك يەلەندى.
بىلتىر 55 كگ سالماق دارەجەسىندە ونەر كورسەتىپ, جاستار اراسىندا الەم چەمپيونى اتانعان يسحار قۇرباەۆ بيىل 60 كگ سالماقتا كۇرەسۋدى كوپ كوردى. ونداعى ماقساتى – الداعى ۋاقىتتا وتەتىن وليمپيا ويىندارىنىڭ ىرىكتەۋ سايىستارىنا قاتىسۋ. بىراق جاڭا سالماق جەتىسۋلىق جىگىتكە جاقپادى. يسحار باستاپقى باسەكەدە سان سوعىپ قالدى. بۇل سالماقتا قىزىلوردالىق ايدوس سۇلتانعاليدىڭ مىقتىلىعىنا ءتانتى بولدىق. الەم چەمپيوناتىنىڭ ەكى دۇركىن قولا جۇلدەگەرى, ازيا چەمپيونى جارتىلاي فينالدا ءوزىنىڭ سىرالعى قارسىلاسى, اقتوبەلىك مەيرامبەك ايناعۇلوۆپەن ايقاستى. جالپى, وسى ەكى سپورتشى اسا ءىرى حالىقارالىق دودالارعا الما-كەزەك بارىپ ءجۇر. مەيرامبەك تە – وسال بالۋان ەمەس. ول دۇنيەجۇزىلىك دودادا ءبىر كۇمىس پەن ءبىر قولاعا قول جەتكىزىپ, قۇرلىق بىرىنشىلىگىندە 2 كۇمىس پەن 2 قولانى قورجىنعا سالدى. ازيادادا ءۇشىنشى ساتىعا جايعاستى. بۇعان دەيىن ەكەۋى ءبىر رەت قانا كەزدەسكەن ەكەن. ول كەزدە ايناعۇلوۆتىڭ اسىعى الشىسىنان تۇسسە, ارادا جەتى جىل وتكەننەن سوڭ سۇلتانعالي كەتكەن ەسەنى قايتاردى. فينالدا سىر بويىنىڭ سايىپقىرانى جەتىسۋلىق عالىم قابدۋناساروۆتى سان سوقتىردى.
77 كگ سالماقتاعى دەمەۋ جادىراەۆتىڭ جانكەشتىلىگىنە ريزا بولدىق. ءاربىر كەزدەسۋىندە ول كىل مىقتىلارمەن بەلدەستى. 34 جاستاعى كوكجال بىرقاتار اسا ءىرى حالىقارالىق تۋرنيرلەردىڭ جەڭىمپازى, شىمكەنتتىك ومار ساتاەۆ پەن ازيا چەمپيونى, قاراعاندىلىق يبراگيم ماگامادوۆتى جەڭىپ, فينالدا قۇرلىق بىرىنشىلىگىنىڭ جەڭىمپازى, قوستانايلىق تەمىرلان شادۋكاەۆتى شاڭ قاپتىردى. ماگومادوۆ پەن شىمكەنتتىك ءابدىازيم قاراباەۆ قولاعا قول سوزدى.
87 كگ سالماقتا استانالىق ازامات قۇستىباەۆ ەل چەمپيونى اتاندى. فينالدا جاراقات الۋىنا بايلانىستى ونىڭ قارسىلاسى ءارى كوماندالىق ارىپتەسى ماقسات سايلاۋ بوزكىلەمگە شىقپادى. جەتىسۋلىق دياس قالەن مەن وسكەمەندىك تەمىرلان تۇرداقىن ءۇشىنشى ورىندى قاناعات تۇتتى. اسا اۋىر سالماقتا شىمكەنتتىك ءالىمحان سىزدىقوۆتىڭ شوقتىعى بيىك بولدى. وسكەمەندىك سالاۆات احمەتقالي ەكىنشى جانە قوستانايلىق مانسۇر شادۋكاەۆ پەن شىمكەنتتىك جوھار ۇزاروۆ ءۇشىنشى ورىنعا تابان تىرەدى.
ەلورداداعى جارىستا توپ جارعان بالۋاندار ەندى 11-16 ءساۋىر ارالىعىندا بىشكەكتە جالاۋى جەلبىرەيتىن ازيا چەمپيوناتىنا قاتىسادى. قىرعىزستاننىڭ استاناسىندا 60 كگ, 67 كگ, 77 كگ, 87 كگ, 97 كگ جانە 130 كگ سالماق دارەجەلەرى بويىنشا وليمپيا ويىندارىنىڭ ليتسەنزيالارى ساراپقا سالىنادى. قازاقستاننىڭ گرەك-ريم كۇرەسى شەبەرلەرى اراسىندا 87 كگ سالماقتاعى نۇرسۇلتان تۇرسىنوۆ بىلتىر قىتايدىڭ حانجوۋ قالاسىندا الاۋى تۇتانعان ازيا ويىندارىندا پاريج وليمپياداسىنىڭ جولداماسىنا يەلىك ەتتى. ياعني العا قويعان ماقساتى ورىندالدى. سول سەبەپتى دە بۇل سالماقتاعى ءبىزدىڭ بالۋاندار بىشكەكتە كۇرەسپەيدى.
ءبىر ايتا كەتەرلىگى, استاناداعى جارىستا 82 كگ سالماقتاعى رەسەي چەمپيونى, جاستار اراسىنداعى (U-23) الەم بىرىنشىلىگىنىڭ قولا جۇلدەگەرى, اسكەريلەر اراسىندا الەم چەمپيونى ءشامىل ولجاەۆ تا باق سىناۋعا بەل بۋعان ەدى. الايدا قازاقستاننىڭ تولقۇجاتى بولماعاندىقتان, شەشەن سپورتشىسىنىڭ بۇل دوداعا قاتىسۋىنا رۇقسات بەرىلمەدى.