قازاقستاننىڭ ەڭبەك سىڭىرگەن قايراتكەرى, ءانشى ءبىرجان حاسانعاليەۆ اكەسى - تانىمال كومپوزيتور ەسكەندىر حاسانعاليەۆتىڭ قازاق ۇلتتىق كونسەرۆاتورياسىن نەگە اياقتاماعانىن ايتتى, دەپ حابارلايدى Egemen.kz.
«مەنىڭ ءومىرىم» باعدارلاماسىنا قوناق بولعان ونەر يەسىنىڭ سوزىنشە, اكەسى كونسەرۆاتوريانىڭ سوڭعى كۋرسىندا وقىتۋشىمەن سوزگە كەلىپ قالىپ, وقۋدان شىعىپ كەتكەن.
- ول كونسەۆاتوريادا 6 جىلداي وقىپ, سوڭعى كۋرسىندا كەتىپ قالعان. ويتكەنى, ءبىر جاعداي بولعان - وقىتۋشىمەن ۇرىسىپ قالعان. مۇعالىمى نەگىزى وتە جاقسى مامان ەدى. بىراق مىنەزى اشۋشاڭ بولعان سياقتى. سوڭعى كۋرس. ديپلومدىق جۇمىس. ورفەي دەگەن كومپوزيتوردىڭ «گليۋك» دەگەن وپەراسى بار, ديپلومدىق جۇمىسىنا سونى تاقىرىپ قىلىپ العان. قىزۋ دايىندىق. ول كەزدە اكەم جاس قوي. ءبىر جاعىنان جۇمىس جوق, ءالى سونشالىقتى تانىمال ەمەس. كەيدە تاماق تا ىشپەي قالادى. سوندا سول مۇعالىم ۇرادى ەكەن. سونداي ادەتى بار, - دەدى ءبىرجان حاسانعاليەۆ.
بۇل ادەتتىڭ قازىرگى زامانعا ساي كەلمەيتىنىن دە اتاپ وتكەن ول بۇگىنگى ستۋدەنتتەر ونداي مىنەزى بار وقىتۋشىنى سوتقا دا بەرۋى مۇمكىن ەكەنىن جەتكىزدى.
- ءبىر رەت قاتتى ۇرىپ جىبەرگەن. اكەم دە شىداماي «نەگە ولاي ىستەيسىز؟» دەپ مۇعالىمنىڭ قولىنان ۇرىپ جىبەرگەن. سول كەزدە ول كىسى رەكتورعا بارىپ «نە مەنىڭ ستۋدەنتىم كەتەدى نەمەسە مەن كەتەمىن» دەگەن ەكەن. ال سول كىسىنىڭ كۇيەۋى تسۋكانوۆ دەگەن قازسسر-ءدىڭ مادەنيەت ءمينيسترىنىڭ ورىنباسارى بولعان. سول كىسىنىڭ جۇبايى بولعان عوي. سودان وقۋدان شىعىپ كەتتى, - دەدى ونەر يەسى اكەسى تۋرالى.
ودان كەيىن ەسكەندىر حاسانعاليەۆتى كونسەرۆاتورياعا قانشا شاقىرسا دا, سول نامىسىنا تيگەن وقيعا 10-15 جىل بويى جۇرەگىندە قالىپ قويىپتى.
- ءسويتىپ كونسەرۆاتوريانى بىتىرە المادى. كەيىن ءال-فارابي اتىنداعى شىمكەنتتىڭ ونەر ينستيتۋتىندا ءبىلىم الىپ, سونى اياقتادى, - دەدى ءبىرجان حاسانعاليەۆ.