كۇندەلىكتى جاياۋ ءجۇرۋدىڭ, ءتىپتى جاي عانا اياڭداۋدىڭ دەنساۋلىققا پايداسى زور, دەپ حابارلايدى Egemen.kz.
ادام اعزاسى ءۇشىن قيمىل-قوزعالىس سالاماتتى ءومىردىڭ ءبىر كەپىلى. ال كۇن سايىن كەمىندە 10 مىڭ قادام جۇرەتىن بولساڭىز, اعزادا بايقالاتىن وزگەرىستەر:
- اياق بۇلشىقەتتەرىن قاتايتادى, توزىمدىلىك پەن تاباندىلىققا جول باستايدى. بەلسەندى فيزيكالىق جاتتىعۋلار بۇلشىقەتتى عانا نىعايتىپ قويماي, جۇرەك-قانتامىرلار جۇيەسىنىڭ جۇمىسىن دا جاقسارتادى.
- جۇرەككە پايدالى ەڭ قاراپايىم جاتتىعۋ. قانداعى حولەستەرين مەن قىسىمدى تومەندەتۋگە كومەكتەسەدى, جۇرەك بۇلشىقەتىن قالىپقا كەلتىرەدى.
- كۇندەلىكتى جاياۋ ءجۇرىپ سەرۋەندەۋ ارتىق سالماق قوسپاۋدىڭ ءبىر سەبەپكەرى. قيمىلداۋ ارقىلى اعزاداعى زات الماسۋ, اسقازان-ىشەك جولدارى قىزمەتى جاقسارادى.
- فيزيكالىق بەلسەندىلىكتەن باقىت گورمونى ەندورفين بولىنەدى. بۇل ارقىلى ادامنىڭ كوڭىل-كۇيى كوتەرىلىپ, كۇيزەلىسى ازايادى. تازا اۋادا سەرۋەندەۋ دە اعزانىڭ تىنىعۋىنا پايدالى.
- جاياۋ ءجۇرۋ اعزاعا كوپ سالماق تۇسىرمەيتىن جاتتىعۋ. سۇيەكتى قاتايتىپ, وستەوپوروز دەرتىنە شالدىقپاۋعا كومەكتەسەدى.