قازاقستاننىڭ ەكى بىردەي كاسىپقوي بوكسشىسى جارقىن جەڭىستەرىمەن جانكۇيەرلەرىن قۋانتتى. ولار – انگەلينا لۋكاس پەن اسقات جانتۇرسىنوۆ.
انگەلينا لۋكاس ازەربايجاننىڭ استاناسى باكۋدە وتكەن جارىستا پاكىستاندىق روما يۋسافپەن قولعاپ ءتۇيىستىردى. 26 جاستاعى تاراز قالاسىنىڭ تۋماسى العاشىندا اۋەسقويلار اراسىندا ەلەۋلى تابىستارعا قول جەتكىزدى. ەل چەمپيونى اتاندى, بىرقاتار حالىقارالىق دودادا دارالاندى. 2021 جىلدىڭ جەلتوقسان ايىندا كاسىپقوي رينگتەگى تۇساۋكەسەر كەزدەسۋىن وتكىزدى. سول كەزدەن بەرى التى جەكپە-جەك وتكىزىپ, بەسەۋىندە جەڭىسكە جەتتى. ەكى قارسىلاسىن نوكاۋتقا جىبەردى. قىسقا عانا مەرىزىمدە UBO جانە WBC International نۇسقالارى بويىنشا التىن بەلبەۋدى يەلەندى.
25 جاستاعى روما يۋساف تا وسالدار ساناتىنان ەمەس. ول بەس باسەكەنىڭ بارلىعىندا باسىمدىق تانىتتى. قوس مىقتى اسا جەڭىل سالماقتىڭ WIBA نۇسقاسىنىڭ چەمپيوندىق اتاعى ءۇشىن تالاستى. بىراق پاكىستاننىڭ وكىلى جەرلەسىمىزگە لايىقتى قارسىلىق كورسەتە المادى. سەگىز راۋندقا ەسەپتەلگەن كەزدەسۋ ءبىرىنشى راۋندتا اياقتالدى. باسەكە باستالعان بەتتە لۋكاس يۋسافتى ەسىنەن تاندىرىپ, التىن بەلبەۋدى يەلەندى.
ءدال سول جارىستا ونەر كورسەتكەن اسا اۋىر سالماقتاعى اسقات جانتۇرسىنوۆ تا كوپشىلىكتىڭ قوشەمەتىنە بولەندى. وسىعان دەيىن ول جەتى رەت شارشى الاڭعا شىعىپ, الاتاۋىندا جەڭىسكە جەتكەن ەدى. بەس قارسىلاسىن ۇرىپ جىقتى. باكۋدە اسقاتقا گرۋزيالىق مۋگاۆيل مۇساەۆتى ايقىن جەڭۋ ءۇشىن نەبارى 12 سەكۋند جەتكىلىكتى بولدى.