استانادا ايەلدەر كۇرەسىنەن قازاقستان چەمپيوناتى اياقتالدى. رەسپۋبليكامىزدىڭ بارلىق ايماعىنان كەلگەن 107 بۇرىمدى ءبىر تاۋلىكتىڭ ىشىندە 10 سالماق دارەجەسى بويىنشا بەلدەسىپ, ءوزارا باسەكەدە مىقتىلار مەن وسالداردى انىقتادى.
كورەرمەندەر نازارى 76 كگ سالماق دارەجەسىنە اۋدى. سەبەبى بۇل سالماقتا ريو وليمپياداسى مەن دجاكارتاداعى ازيا ويىندارىنىڭ قولا جۇلدەگەرى, ازيا چەمپيوناتىندا جەتى رەت (2 التىن, 2 كۇمىس, 3 قولا) جەڭىس تۇعىرىنا كوتەرىلگەن قاراعاندىلىق ەلميرا سىزدىقوۆا مەن استانالىق ءجاميلا باقبەرگەنوۆا كۇرەستى. ءدال بۇگىن, ياعني 5 اقپاندا ەلميرا 32 جاسقا تولدى. دەسەك تە ونىڭ قارسىلاسى دا وسال ەمەس ەدى. وسىدان تۋرا ءبىر اي بۇرىن 28 جاسقا تولعان ءجاميلا – الەم چەمپيوناتىنىڭ ەكى دۇركىن كۇمىس جانە ءبىر مارتە قولا جۇلدەگەرى, ازيانىڭ ءۇش دۇركىن چەمپيونى جانە ەكى مارتە جۇلدەگەرى. دەسەك تە ول بۇل اتاقتىڭ بارلىعىنا 72 كگ سالماق دارەجەسىندە ونەر كورسەتكەن كەزدەرى قول جەتكىزدى. ال باقبەرگەنوۆانىڭ تۇپكى ماقساتى – وليمپيا ويىندارىندا اتوي سالۋ. سول سەبەپتى دە وعان دەرەۋ سالماعىن اۋىستىرۋعا تۋرا كەلدى.
اسا اۋىر سالماقتاعى قاتىسۋشىلار سانىنىڭ ازدىعىنان جارىس اينالمالى جۇيە بويىنشا ءوتتى. العاشىندا ەكەۋى ەكىنشى كەزەڭدە كەزدەسىپ, اسا شيەلەنىستى باسەكە 5:3 ەسەبىمەن سىزدىقوۆانىڭ پايداسىنا شەشىلدى. بۇل جاعداي ءجاميلانى جاسىتقان جوق. كەرسىنشە, جىگەرلەندىرە ءتۇستى. ودان كەيىن وزگە بالۋاندارى سىپىرا ۇتقان ول اقتىق سايىستا سىرالعى قارسىلاسىمەن قايتا جولىقتى. بۇل جولى باقبەرگەنوۆانىڭ باعى جاندى. باسەكە بارىسىندا ۇتىلىپ جاتقانىنا قاراماستان ول سوڭىنا دەيىن ايانباي ايقاستى. اقىرى وڭتايلى تۇستا ەلميرانى كەۋدەسىنەن اسىرا لاقتىردى. تورەشى ءجاميلانىڭ بۇل ءادىسىن ءتورت ۇپايمەن باعالادى. وسىلايشا, چەمپيوندىق اتاق ەلوردالىق ارۋعا بۇيىردى. ەلميرا كۇمىس جۇلدەنى قاناعات تۇتتى. قولا مەدالدى گۇلمارال ەركەباەۆا ەنشىلەدى.
68 كگ سالماقتا كۇش سىناسقان ءجاميلانىڭ سىڭارى ازيا چەمپيونى ءمادينا باقبەرگەنوۆا اقتىق سىنعا دەيىن القىنباي جەتكەنىمەن, فينالدا كوپتى كورگەن 37 جاستاعى شىمكەنتتىك سپورتشى ەلەنا شالىگينامەن بەلدەستى. ونىڭ بەيجىڭ وليمپياداسى (1 قولا), الەم چەمپيوناتى (1 كۇمىس, 2 قولا), ازيا ويىندارى (1 التىن), قۇرلىق بىرىنشىلىگى (2 التىن, 2 كۇمىس, 2 قولا) جانە يسلام ىنتىماقتاستىعى ويىندارىندا (1 التىن) اتوي سالعانىن جانكۇيەرلەر جاقسى بىلەدى. ءمادينا ەلەنانى ەڭسەرە المادى.
وزگە سالماق دارەجەلەرىندە مىنا بالۋاندار التىننان القا تاقتى: 50 كگ – لاۋرا عانيقىزى (الماتى قالاسى), 53 كگ – جۇلدىز ەشىموۆا (استانا), 55 كگ – ءزۇلفيا ياحياروۆا (قاراعاندى), 57 كگ – ەمما تيسينا (استانا), 59 كگ – ديانا كايۋموۆا (استانا), 62 كگ – يرينا كۋزنەتسوۆا (اكمولا), 65 كگ – يرينا كازيۋلينا (اباي) جانە 72 كگ – اناستاسيا پاناسوۆيچ (بقو).