اتىراۋدا شاحماتقا بەت بۇرعان ورەندەردىڭ اراسىندا بەس جاسار بالاقاي بار. اتى-ءجونى – سانجار ەرمەك. جاقىندا اقىلدىلار ويىنىنا دەن قويعان ول شاحماتتىڭ بليتس تۇرىنەن قازاقستان چەمپيونى اتاندى.
وبلىستىق دەنە شىنىقتىرۋ, سپورت جانە تۋريزم باسقارماسى ءباسپاسوز قىزمەتىنىڭ اقپاراتىنا قاراعاندا, 24 قاڭتار – 2 اقپان ارالىعىندا شىمكەنت قالاسىندا بالالار اراسىندا شاحماتتان ەل چەمپيوناتى ءوتتى. وعان ەلىمىزدىڭ بارلىق وڭىرىنەن 600-دەن استام جاس ورەن قاتىستى.
ەڭ كىشكەنتاي شاحماتشى سانجار ەرمەك 6 جاستاعى بالالار اراسىندا باق سىنادى. زەرەكتىگىمەن ەرەكشەلەنگەن ول چەمپيوناتتىڭ ەكى جۇلدەسىن يەلەندى. شاحماتتىڭ بليتس تۇرىنەن ەل چەمپيونى اتاندى. ال كلاسسيكالىق شاحماتتان قولا جۇلدەگە يە بولدى.
بەس جاسار چەمپيون وتكەن جىلدىڭ ساۋىرىنەن بەرى اعا-اپكەسىمەن بىرگە «Guw chess» شاحمات كلۋبىندا ءدارىس الىپ ءجۇر. اكە-شەشەسى بالالارىنىڭ شاحماتقا اۋەستىگىنە قولداۋ بىلدىرگەن. قازىر ولارعا جاتتىقتىرۋشى ديليارا عابيتوۆا شاحماتتىڭ قىر-سىرىن ۇيرەتەدى.
«شاحمات – اقىلدىلار ويىنى. ونى مەڭگەرۋ وڭاي ەمەس. ال سانجار شاحماتتى قاتتى ۇناتتى. قازىر سمارتفونداعى ويىندارعا كوڭىل اۋدارمايدى. ول 6 ايدا جاقسى ناتيجە كورسەتىپ, ءتورتىنشى, ءۇشىنشى رازريادتى يگەردى. بىلتىرعى قاراشا ايىندا 6 جاسقا دەيىن بالالار اراسىندا اتىراۋ وبلىسىنىڭ چەمپيونى, «KSI chess Open» وبلىستىق ءتۋرنيرىنىڭ جەڭىمپازى اتانعان بولاتىن», دەيدى ديليارا عابيتوۆا.
اتىراۋ وبلىسى