عىلىم جانە جوعارى ءبىلىم مينيسترلىگى تالاپكەرلەردىڭ, ونىڭ ىشىندە ەرەكشە ءبىلىم بەرۋ قاجەتتىلىكتەرى بار تۇسۋشىلەردىڭ تەستىلەۋدى ىڭعايلى تاپسىرۋى ءۇشىن ءارتۇرلى شارالاردى قابىلداۋدى جالعاستىرىپ جاتىر, دەپ حابارلايدى Egemen.kz ۇلتتىق تەستىلەۋ ورتالىعىنا سىلتەمە جاساپ.
وتكەن جىلدارداعىداي, بيىل دا ۇبت-دا ەرەكشە ءبىلىم بەرۋ قاجەتتىلىكتەرى بار تالاپكەرلەر ءۇشىن ۇسىنىلاتىن قوسىمشا 40 مينۋت ۋاقىتتىڭ ساقتالاتىندىعىن ايتقان ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ: «سونىمەن قاتار كورۋ قابىلەتى بۇزىلىسقا ۇشىراعان بالالاردىڭ ىڭعايى ءۇشىن سىزبا جانە دياگراممالارسىز سۇراقتار ازىرلەندى. قابىلدانعان شارالاردىڭ ارقاسىندا تەستىلەۋگە قاتىساتىن مۇمكىندىگى شەكتەۋلى بالالاردىڭ سانى ارتىپ كەلەدى. ەگەر 2021 جىلى ۇبت - عا 90 بالا قاتىسسا, 2022 جانە 2023 جىلدارى ولاردىڭ سانى 500 ادامعا جەتتى», دەدى.
ونىڭ ايتۋىنشا, اتالعان باعىتتا جۇمىستار جالعاسادى.
ايتا كەتسەك, قاجەت بولعان جاعدايدا ەرەكشە ءبىلىم بەرۋ قاجەتتىلىكتەرى بار تالاپكەرلەرگە ۇبت-دا ءپان مۇعالىمى ەمەس كومەكشىلەر ۇسىنىلادى.