پرەمەر-مينيستر ءاليحان سمايىلوۆ قىرعىزستان مينيسترلەر كابينەتىنىڭ توراعاسى - پرەزيدەنت اكىمشىلىگىنىڭ باسشىسى اقىلبەك جاپاروۆپەن كەلىسسوز جۇرگىزدى. كەزدەسۋ الماتىدا ەۋرازيالىق ۇكىمەتارالىق كەڭەس وتىرىسى قارساڭىندا ءوتتى, دەپ جازادى Egemen.kz.
ءاليحان سمايىلوۆ اتاپ وتكەندەي, قىرعىزستان قازاقستان ءۇشىن ستراتەگيالىق ارىپتەس جانە باۋىرلاس مەملەكەت بولىپ تابىلادى.
ء«بىزدىڭ كوشباسشىلارىمىزدىڭ ساياسي ەرىك-جىگەرىنىڭ ارقاسىندا بۇگىندە قازاق-قىرعىز قارىم-قاتىناسى ساپالى جاڭا دەڭگەيگە كوتەرىلدى», دەدى پرەمەر-مينيستر.
ۇكىمەت باسشىسى سونداي-اق ەلدەر اراسىنداعى ساۋدا-ەكونوميكالىق ءوزارا ءىس-قيمىلدىڭ قارقىندى دامىپ كەلە جاتقانىن اتاپ ءوتتى. وتكەن جىلدىڭ 11 ايىندا عانا ءوزارا تاۋار اينالىمى 12 پايىزعا ءوسىپ, 1.3 ميلليارد دوللارعا جەتتى. سونىمەن قاتار قازاقستان رەسپۋبليكاسى مەن قىرعىز رەسپۋبليكاسى تاۋار اينالىمىن 2 ميلليارد دوللارعا جەتكىزۋ بويىنشا بىرلەسكەن جۇمىستى جالعاستىرىپ جاتىر.
«بۇعان ۇكىمەتارالىق كەڭەس پەن وڭىرارالىق ىنتىماقتاستىق فورۋمى سياقتى ەكىجاقتى ىنتىماقتاستىق تەتىكتەرىنىڭ ءتيىمدى قىزمەتى ىقپال ەتىپ وتىر. قازاقستان ۇكىمەتى قازاقستان-قىرعىزستان ستراتەگيالىق ارىپتەستىگىن بارلىق سالالاردا ودان ءارى قولداۋعا دايىن», دەدى ءاليحان سمايىلوۆ.
ءوز كەزەگىندە اقىلبەك جاپاروۆ قىرعىزستان مەن قازاقستان اراسىنداعى قازىرگى قارىم-قاتىناس ساياسي ديالوگتىڭ جوعارى دەڭگەيىن راستايتىنىن اتاپ ءوتتى.
ء«وزارا ساۋدا مەن ينۆەستيتسيا كولەمى جىل سايىن ارتىپ, ىسكەرلىك, عىلىمي جانە مادەني بايلانىستار جاندانىپ كەلەدى. ۇكىمەتارالىق كەڭەس اياسىندا قىرعىز-قازاقستان ىنتىماقتاستىعىن ۇزاق مەرزىمدى دامىتۋدىڭ ستراتەگيالىق ماقساتتارى, تۇجىرىمدامالىق تاسىلدەرى مەن باعىتتارى ورتاق. ءبىزدىڭ ەلدەر اراسىنداعى بەلسەندى ءوزارا ءىس-قيمىل كوپجاقتى پلاتفورمالاردا جۇزەگە اسىرىلىپ جاتىر», دەدى ول.
اقىلبەك جاپاروۆ قىرعىز تاراپىنىڭ قازاقستانمەن ءوزارا سەنىم مەن تۇسىنىستىككە نەگىزدەلگەن وداقتاستىق قاتىناستاردى ودان ءارى تەرەڭدەتۋگە مۇددەلى ەكەنىن اتاپ ءوتتى.
كەزدەسۋ بارىسىندا ۇكىمەت باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن, سونىڭ ىشىندە ساۋدا-ەكونوميكالىق جانە مۇناي-گاز سالالارىنداعى ماسەلەلەردى تالقىلادى.
سونىمەن قاتار تاراپتار قازاق-قىرعىز شەكاراسىندا جۇك كولىكتەرى ءۇشىن قوسىمشا وتكىزۋ پۋنكتىن اشۋ ماسەلەسىن جەدەل پىسىقتاۋعا, سونداي-اق سۋ-ەنەرگەتيكا سالاسىنداعى ىنتىماقتاستىقتى نىعايتۋعا كەلىستى.