جەرلەستەرىمىز جەڭىسكە جەتتى

اتالعان دودادا قازاقستاننىڭ ەكىنشى راكەتكاسى يۋليا پۋتينتسەۆا ءساتتى ونەر كورسەتىپ جاتىر. تۇساۋكەسەر كەزدەسۋىندە جەرگىلىكتى ويىنشى تحاساپورن ناكلونى 5:7, 6:3, 6:2 ەسەبىمەن ۇتقان ول ەكىنشى كەزەڭدە شۆەي­تساريالىق ۆيكتوريا گولۋبيچپەن شەبەر­لىك بايقاستى. ەكەۋى الەمدىك رەيتينگتە قاتار تۇر. ناقتىلاپ ايتساق, پۋتينتسەۆا – 68 جانە گولۋبيچ – 69-ورىندا. تاجىريبەلى تەننيسشىلەردىڭ باسەكەسى وتە شيەلەنىستى ءوتىپ, تاي-برەيككە دەيىن جالعاستى. شەشۋشى تۇستا شيراق قيمىلداعان جەرلەسىمىز 7:6, 7:6 ەسەبىمەن جەڭىسكە جەتتى. ەندى شيرەك فينالدا يۋليا WTA تىزىمىندە 44-ساتىعا تۇراقتاعان قىتايلىق سينيۋي ۆانمەن سايىسقا تۇسەدى.

فرانتسيانىڭ مونپەلەسىندە جالاۋى جەلبىرەگەن جارىستا ەلىمىزدىڭ ەكى ويىنشىسى باق سىناپ جاتىر. بۇل ءتۋرنيردىڭ جۇلدە قورى 579 320 ەۋرونى قۇرادى. العاشقى بولىپ كورتقا شىققان الەكساندر شەۆچەنكو چەحيالىق داليبور سۆرچيناعا سان سوقتىردى – 6:4, 4:6, 6:4. ءبىرىنشى اينالىمدا بوس بولعان الەكساندر بۋبليك ەكىنشى كەزەڭدە كانادالىق دەنيس شاپوۆالوۆتان باسىم ءتۇستى – 1:6, 7:6, 6:3. ال گەرمانيانىڭ كوبەلەنتس قالاسىنداعى تۋرنيردە ميحايل كۋكۋشكين چەحيالىق مارتين دامنىڭ وسال تۇسىن تابا المادى – 6:7, 7:5, 6:7.