بۇگىن پاريجدە دزيۋدودان Grand Slam ءتۋرنيرى باستالدى. بۇل جارىستا 110 مەملەكەتتەن كەلگەن 661 بالۋان باق سىناپ جاتىر.
قازاقستان ۇلتتىق قۇراماسىنىڭ باس باپكەرى نۇربول سۇلەيمەنوۆ فرانتسيانىڭ باس شاھارىندا 14 شاكىرتىنە سەنىم ارتىپ وتىر. سولاردىڭ قاتارىندا ەلدوس سمەتوۆ تە بار. جاسىراتىنى جوق, قازىر ەلىمىزدىڭ ەڭ اتاقتى دزيۋدوشىسىنىڭ جاعدايى ءماز ەمەس. ول الەمدىك رەيتينگتە نەبارى 35-ورىندى قاناعات تۇتىپ تۇر. وزگەلەردى ايتپاعاندا, تىپتەن ماعجان شامشادين مەن نۇرقانات سەرىكباەۆ سىندى ەكى بىردەي جەرلەسىمىز سمەتوۆتىڭ الدىن وراپ تۇر. مىنە, ەندى وعان جاعدايدى تۇزەۋ ءۇشىن تاماشا مۇمكىندىك تۋىنداپ وتىر. ەگەر وسى جولى دا ءساتسىز ونەر كورسەتسە, وندا ەلدوستىڭ وليمپياداعا بارۋى ەكىتالاي.
سونداي-اق اتالعان تۋرنيردە قازاق ەلى نامىسىن نۇرقانات سەرىكباەۆ (60 كگ), عۇسمان قىرعىزباەۆ (66 كگ), ەسەت قۋانوۆ (66 كگ), اسقار نارقۇلوۆ (73 كگ), دانيار شامشاەۆ (73 كگ), ابىلايحان جۇبانازار (81 كگ), رۋسلان مۇساەۆ (81 كگ), ايدار اراپوۆ (90 كگ), ەرماحان انۋاربەكوۆ (90 كگ), نۇرلىحان شارحان (100 كگ), بەكزات شاعاتاەۆ (100 كگ), عالىمجان قىرىقباي (+100 كگ) جانە ەراسىل قاجىباەۆ (+100 كگ) سىندى بالۋاندار قورعايدى.