وبلىس ورتالىعىندا ارقانىڭ كەربەز سۇلۋ كوكشەتاۋىنىڭ تامىلجىعان تابيعاتىن, قۇت-قويناۋىن, عاجايىپ ءسان-سالتاناتىن پاش ەتەتىن مازمۇندى, اسەرلى كونتسەرت قويىلدى.
اۋەلى كوكشەنىڭ كوركەم بەينەسىن كەستەلەيتىن «كوكشەتاۋ» پوەزيالىق كومپوزيتسياسى كورەرمەن نازارىنا ۇسىنىلدى. كوز جاۋىن الاتىن جاقۇتتاي جارقىراعان سۇلۋلىق, كيەلى تابيعاتتىڭ قاستەرلى بەينەسى كورەرمەن كوڭىلىن جاۋلاپ, كوكىرەگىندەگى ماقتانىش سەزىمىن وياتتى. ىلە دينا ورمانشينا جەتەكشىلىك ەتەتىن «اسىل مۇرا» حالىقتىق بي ءانسامبلى كوركەمدەگەن ساكەن سەيفۋلليننىڭ «ارقانىڭ كەربەز سۇلۋ كوكشەتاۋى» ورىندالدى. ءان جاۋھارى جەر شوقتىعى كوكشەتاۋدىڭ بار قاسيەتىن بەينەلەپ, كورىكتى ەتىپ جەتكىزدى. الديلەگەن اۋەنى قانداي. ىلكىدەگى تالاسسىز دارىنداردىڭ لايىقتى ءىزباسارى, كوكشەلىك كومپوزيتور يران سال تاسقارانىڭ «كوكشەتاۋ ءۆالسىن» تىڭدارمان قاۋىم سۇيسىنە تىڭدادى. قر ەڭبەك سىڭىرگەن ءارتىسى بيسارا ماسكەنوۆا, قر مادەنيەت سالاسىنىڭ ۇزدىگى, ءداستۇرلى ءانشى كەنجەباي مۇقىشەۆ, حالىقارالىق, رەسپۋبليكالىق بايقاۋلاردىڭ لاۋرەاتتارى ازامات قابدىل مەن ءادىل قۇسايىنوۆتار ۇكىلى ىبىراي مەن اقان سەرىنىڭ اندەرىن تامىلجىتا ورىندادى.
كەش بارىسىندا بۇگىنگى ونەرپازداردىڭ دا شىعارمالارى ورىندالىپ, تۇساۋى كەسىلدى. ماسەلەن, «سال كوكشە» ءانى. ءاننىڭ ءسوزىن بەلگىلى اقىن قۋانىش وسپان جازسا, ءانىن مارعۇلان وسپانوۆ شىعارعان. سونداي-اق قاراتاي بايكەنوۆتىڭ سوزىنە جازىلعان ەسىمجان جاپاروۆتىڭ «كوكشەم مەنىڭ» ءانى دە كوپشىلىك كوڭىلىنەن شىقتى. بەلگىلى اقىن تولەگەن قاجىباەۆتىڭ سوزىنە جازىلعان كومپوزيتور قۇرمەت ساقايدىڭ «كوكشەتاۋ ءۆالسى» شۇرايلى شىعارمالاردىڭ ءبىرى بولدى.
بۇل ەجەلدەن ءان اۋەلەپ, ولەڭ قونعان ولكەدە تۋعان جەردىڭ مارتەبەسىن بيىكتەتىپ, قادىر-قاسيەتىن كەيىنگى ۇرپاقتىڭ كوكىرەگىنە قۇيىپ, سۇيەگىنە سىڭىرەتىن ادەمى كەش بولدى.
كوكشەتاۋ قالاسى