بۇگىن «بارمىسىڭ, باۋىرىم» حابارىنىڭ تىكەلەي ەفيرىندە بەلگيا ازاماتتارى اسىراپ العان جانىبەكتىڭ ىسىنە قاتىستى تىڭ اقپارات ايتىلدى. راديو-حابار جۇرگىزۋشىسى قىمبات دوسجان سول ەلدىڭ ەلشىلىگىنە جولداعان ساۋالىنا جاۋاپ كەلگەنىن حابارلادى, دەپ جازادى Egemen.kz.
«بارمىسىڭ, باۋىرىم» رەداكتسياسى قازاقستاننىڭ بەلگياداعى ەلشىلىگىنە 2 ساۋالمەن جۇگىنگەن.
1. «جانىبەك جۇماعۇلوۆتى اسىراپ العان بەلگيالىق كەلىنشەكتىڭ ەسەبى نەگە تۇگەل ەمەس؟».
2. «جانىبەك جۇماعۇلوۆتى اسىراپ العان شەتەل ازاماتى بىرنەشە رەت مەديتسينالىق ەمدەۋ مەكەمەسىنە جاتقىزىلعان. سول جىلدارى قازاقستاننىڭ بەلگياداعى ەلشىلىگى, قازاقستاننىڭ سىرتقى ىستەر مينيسترلىگى بالانىڭ جاعدايىنان حاباردار بولعان با؟ ەگەر مەملەكەتتىك ورگاندار حاباردار بولسا, قانداي شەشىم قابىلداندى؟».
جۋرناليستەر جولداعان سۇراققا بەلگياداعى قازاقستاننىڭ توتەنشە جانە وكىلەتتى ەلشىسى مارعۇلان بايمۇحان جاۋاپ بەرگەن.
«جانىبەك جۇماعۇلوۆ بەلگياداعى ەلشىلىككە كومەك سۇراپ حابارلاسپاعان. سونداي-اق ەددي جان ساۆەلەۆتى اسىراپ الۋ پروتسەسى بالا اسىراۋ اگەنتتىكتەرىنىڭ قاتىسۋىنسىز جۇزەگە اسىرىلعان. ياعني, جانىبەكتى اسىراپ الۋ پروتسەسى جەكە, تىكەلەي بولدى. سونداي-اق ەلشى بەلگياداعى بالا اسىراپ الۋ ورتالىعىنىڭ وكىلى بالا كامەلەت جاسىنا تولعاندىقتان قانداي دا ءبىر ەسەپتەردى, اقپاراتتى سۇراۋعا نەمەسە وسىعان بايلانىستى ودان ءارى باسقا قادامدار جاساۋعا قۇقى جوق دەپ جاۋاپ بەرگەنىن ايتقان», دەدى قىمبات دوسجان.
قىمبات دوسجاننىڭ ايتۋىنشا, جانىبەكتىڭ قازاقستاننىڭ بەلگياداعى ەلشىلىگىنە كومەك سۇراپ حابارلاسپاعانىنا ونىڭ 16 جاسقا تولعاندا اسىراپ العان اناسىنان بولەك تۇرعانى سەبەپ بولعان. ال كامەلەت جاسىنا جەتكەندە جانىبەك يسپانياعا كوشىپ كەتكەن ەدى.