بۇگىن الماتى قالاسى, المالى اۋدانى حالقىمەن كەزەكتى كەزدەسۋىندە ەربولات دوساەۆ الماتى اكىمى رەتىندە ەكى جىل ىشىندە جەتكەن جەتىستىكتەرى تۋرالى سۇراققا جاۋاپ بەردى, دەپ حابارلايدى Egemen.kz.
الماتىلىق ءجۋرناليستىڭ «ەكى جىلدا اتقارعان قانداي ىستەرىمەن ماقتاناسىز» دەگەن ساۋالىنا اكىم ماسەلە ءوزىن قالاي سەزىنەتىنىندە ەمەس, الماتىلىقتاردىڭ ونى قالاي باعالايتىنىندا ەكەنىن ايتتى.
«مەن الماتىنىڭ يگىلىگى مەن دامۋى ءۇشىن شىن جۇرەكتەن ەڭبەك ەتىپ كەلەمىن. ءتۇرلى ىستەر اتقارىلعانىمەن, كەيبىرىن جاساپ ۇلگەرمەدىك. بۇل بولەك ءبىر اڭگىمەنىڭ تاقىرىبى دەپ ويلايمىن. بۇل جەردە ماسەلە مەنىڭ سەزىمىمدە ەمەس, ازاماتتاردىڭ ەڭبەگىمدى باعالاۋىندا. ەگەر جينالىس پەن الداعى كەزدەسۋلەرىم نەمەسە اتقاراتىن ىستەرىمىز ماقۇلدانسا, مەن ءوز ورنىمدامىن جانە جۇمىسىمدى ءتيىمدى اتقارۋعا تىرىسامىن. ءبىز ساڭىراۋ ەمەسپىز, ەستيمىز. سىزدەردىڭ يدەيالارىڭىزبەن, وتىنىشتەرىڭىزبەن العا ۇمتىلامىز. ءبىز ءتىرى ادامبىز, يدەال ەمەسپىز, مەن دە اكىم رەتىندە يدەال ەمەسپىن. بىراق ەكى جىل باسقاشا بولدى, ۋاقىتىم بولعاندا ول تۋرالى دا ايتامىن», دەپ جاۋاپ بەردى الماتى اكىمى.